İtaliyanın XİN rəhbəri ABŞ-yə səfərinin ləğv edilməsinin səbəbini açıqladı - Trampın sözlərinə CAVAB

"İtaliya ABŞ lideri Donald Trampın İtaliyanın Baş naziri Corcia Meloni haqqında səsləndirdiyi ifadələrə mütləq reaksiya göstərməli idi".

Ens.az Oxu.az-a istinadən xəbər verir ki,bu barədə "Il Giornale" nəşri İtaliyanın xarici işlər naziri Antonio Tayaninin açıqlamasına istinadən məlumat yayıb.

"Bu, izaholunmazdır. Bəlkə də, diqqəti yayındırmaq üçün bir manevrdir. Biz cavab verməli idik, biz hörmətə layiqik və cavab verdik", - deyə nazir ABŞ lideri ilə bağlı qalmaqalı şərh edərkən qeyd edib.

Nazir xatırladıb ki, İtaliya bütün dünyada NATO (Şimali Atlantika Alyansı) missiyalarında, o cümlədən Qərbin müdafiəsi üçün ən çox əsgərə malik ölkədir. "Biz nümunəvi ölkəyik və Alyans (NATO) üçün xərcləri də artırırıq", - deyə o bildirib.

Mayamiyə nəzərdə tutulan səfərdən imtina qərarına aydınlıq gətirən Tayani, bunu "yalnız hökumət başçısına deyil, ümumilikdə İtaliya dövlətinə qarşı yönəlmiş təhqirə sərt cavabın verilməsi" kimi xarakterizə edib.

"Tramp, əlbəttə ki, Vladimir Putinə və ya başqasına münasibətdə Meloni ilə davrandığı kimi davranmayıb", - deyə İtaliya xarici işlər naziri vurğulayıb.

Xatırladaq ki, daha əvvəl Tramp bildirmişdi ki, Meloni Fransada keçirilən "Böyük yeddilik" (G7) sammiti zamanı birgə foto üçün ona "yalvarıb". Ağ Ev rəhbəri vurğulamışdı ki, bunu etməyə borclu deyildi, lakin ona yazığı gəldiyi üçün razılaşıb. İtaliyanın Baş naziri bu iddianı "tamamilə uydurma" adlandırıb. Həmçinin İtaliyanın XİN rəhbəri Antonio Tayani ABŞ-yə planlaşdırılan səfərini ləğv edib.

Bundan sonra Ağ Ev rəhbəri bildirib ki, İranla bağlı münaqişədəki mövqeyinə görə artıq İtaliyanın Baş naziri Corcia Meloniyə fanat kimi ehtiyacı yoxdur.