Keçən il dövlət büdcəsinin xərcləri 38 milyard manatı keçib

2025-ci il dövlət büdcəsinin 41 milyard 407.6 milyon manat məbləğində təsdiq olunmuş xərcləri 93.2 faiz və ya 38 milyard 604.6 milyon manat məbləğində icra olunub ki, bu da 2024-cü illə müqayisədə 890.9 milyon manat və ya 2.4 faiz çoxdur.

Ens.Az-ın məlumatına görə, sözügedən məsələ "Azərbaycan Respublikasının 2025-ci il dövlət büdcəsinin icrası haqqında" Qanun layihəsində əksini tapıb.

Qeyd olunub ki, hesabat ilində dövlət büdcəsi xərclərinin ÜDM-də xüsusi çəkisi 29.9 faiz təşkil edib ki, bu da 2024-cü illə müqayisədə 0.1 faiz çoxdur.

2021-ci illə müqayisədə 2025-ci ildə dövlət büdcəsinin xərcləri 11 milyard 182.2 milyon manat və ya 40.8 faiz artmışdır.

Strukturuna görə 2025-ci il dövlət büdcəsi xərclərinin 22 milyard 117.2 milyon manatı və ya 57.3 faizi cari xərclərə (2024-cü illə müqayisədə 773.7 milyon manat və ya 3.6 faiz çox), 2 milyard 99.5 milyon manatı və ya 5.4 faizi dövlət borcuna və öhdəliklərinə xidmətlə bağlı xərclərə (2024-cü illə müqayisədə 803.9 milyon manat və ya 62 faiz çox), 14 milyard 387.9 milyon manatı və ya 37.3 faizi əsaslı xərclərə (2024-cü illə müqayisədə 686.7 milyon manat və ya 4.6 faiz az) yönəldilib.

2024-cü illə müqayisədə dövlət büdcəsinin xərclərinin tərkibində cari xərclərin xüsusi çəkisi 0.7 faiz və dövlət borcuna xidmətlə bağlı xərclərin xüsusi çəkisi 2 faiz artıb, əsaslı xərclərin xüsusi çəkisi isə 2.7 faiz-bənd azalıb.

Qeyd olunmalıdır ki, 2025-ci ilin dövlət büdcəsinin icra olunmuş 22.1 milyard manat məbləğində cari xərclərin 92 faizi (2024-cü illə müqayisədə 0.2 faiz çox) və yaxud 20.4 milyard manatı (2024-cü illə müqayisədə 0.8 milyard manat və ya 3.9 faiz çox) qeyri-neft-qaz sektoru üzrə daxilolmalarının hesabına qarşılanıb