KİV: ABŞ İranda yaşayış binasına zərbə zamanı təxminən bir tonluq bomba istifadə edib

ABŞ hərbçiləri iyulun 30-na keçən gecə İranın Keşm adasında yerləşən yaşayış binasına zərbə endirmək üçün ən güclü qeyri-nüvə bombalarından birini tətbiq edib. Hücum nəticəsində üç nəfər həlak olub.

Ens.az Oxu.az-a istinadən xəbər verir ki, bu barədə "The New York Times" peyk görüntüləri və ekspert rəylərinə istinadən məlumat yayıb.

Nəşrin məlumatına görə, yaranmış kraterin ölçüsü və döyüş sursatının qalıqları zərbə zamanı çəkisi 2 000 funt (təxminən 907 kiloqram) olan MK-84 ağır aviasiya bombasından istifadə edildiyini göstərir.

Qəzet qeyd edib ki, yaşayış binasının yaxınlığında hərbi obyektlərin yerləşdiyini təsdiqləyən hər hansı sübut aşkarlanmayıb. Bildirilir ki, zərbə sıx məskunlaşmış yaşayış ərazisinə endirilib.

ABŞ Mərkəzi Komandanlığının (CENTCOM) nümayəndəsi, kapitan Tim Hokins "The New York Times" nəşrinə açıqlamasında bildirib ki, ABŞ hərbi rəhbərliyi hadisədən xəbərdardır və məsələ ilə bağlı araşdırma aparır. O, həmçinin ABŞ-nin mülki şəxsləri qəsdən hədəf almadığını vurğulayıb.

Xatırladaq ki, ABŞ və İsrail fevralın 28-də İranla müharibəyə başlayıb. İyun ayında Vaşinqton və Tehran bütün cəbhələrdə, o cümlədən Livanda hərbi əməliyyatların dayandırılmasını nəzərdə tutan anlaşma memorandumu imzalayıblar.

Lakin iyulun 8-nə keçən gecə ABŞ İranı Hörmüz boğazı ilə bağlı razılaşmanın şərtlərini pozmaqda ittiham edərək ölkəyə qarşı genişmiqyaslı zərbələri bərpa edib.