KİV: Aİ səfirləri Rusiyaya qarşı sanksiyaların üç il müddətinə uzadılmasını razılaşdırıblar

Avropa İttifaqı (Aİ) səfirləri ilk dəfə olaraq Rusiyaya qarşı fərdi sanksiyaların altı ay deyil, üç il müddətinə uzadılmasını razılaşdırıblar.

Oxu .Az xəbər verir ki, bu barədə "Reuters" diplomatik mənbələrə istinadən məlumat yayıb.

Məlumata görə, söhbət 3 000 nəfərə qarşı tətbiq edilən məhdudiyyətlərdən gedir. Bundan əlavə, Fransa və Lüksemburqun təzyiqi fonunda Aİ üzv ölkələrinin daimi nümayəndələri rusiyalı iş adamları Alişer Usmanov və Mixail Fridmana qarşı sanksiyaların götürülməsinə razılaşıblar.

Daha əvvəl qeyd olunmuşdu ki, Fransa Slovakiya ilə birgə Usmanovun sanksiya siyahısından çıxarılmasını tələb edib. Daha sonra Lüksemburq da Fridmana qarşı məhdudiyyətlərin götürülməsi tələbini irəli sürüb.