Komissiya sədri: Uşaqların sosial şəbəkələrdəki zərərli təsirlərdən qorunması sahəsində mühüm addım atılıb

Milli Məclis "Uşaqların zərərli informasiyadan qorunması haqqında" qanuna dəyişiklikləri qəbul etməklə uşaqları sosial media platformalarındakı zərərli təsirlərdən qorumaq, sağlam düşüncəli gələcək nəslin formalaşması sahəsində mühüm addım atdı.

"Ens.Az" xəbər verir ki, bunu Milli Məclisin Xarici müdaxilələrə və hibrid təhdidlərə qarşı müvəqqəti komissiyasının sədri Ramid Namazov parlamentdə keçirilən "Rəqəmsal inkişaf, süni intellekt və uşaqların sosial şəbəkə platformalarındakı zərərli təsirlərdən qorunması" mövzusunda ictimai müzakirədə çıxışı zamanı deyib.

Onun sözlərinə görə, layihə hazırlanarkən bir sıra inkişaf etmiş və Qərb ölkələrinin təcrübəsi diqqətlə öyrənilib:

"İnformasiya təhlükəsizliyi mövzusu Azərbaycanda həm də uşaqların psixoloji salamatlığının və gələcəyinin mühafizəsi deməkdir. Dəyişikliklər əsasında sosial şəbəkələrdə hesabın açılması üçün minimum yaş şərti müəyyən edildi, provayderlərin məsuliyyəti kəskin artırıldı. Platformalar qarşısında uşaqların həyatının, sağlamlığından, cinsi toxunmazlığına, şərəf və ləyaqətinə təhdik yaradan zərərli məzmunun yayılmasının qarşısını almaq üçün fasiləsiz rejimdə fəaliyyət göstərən rəqəmsal həllər tətbiq etmək və belə məzmun aşkar edildiyi andan etibarən silmək öhdəliyi qoyuldu. Bundan əlavə, fərdi məlumatların qorunması gücləndirildi, yaşın yoxlanılması istisna olmaqla uşaqların fərdi məlumatlarının kommersiya və ya hədəflənmiş reklam məqsədi ilə istifadəsi, üçüncü şəxslərə ötürülməsi qadağan olundu və hesabatlılıq mexanizmi yaradıldı".