KXDR-in atdığı raket Yaponiyanın xüsusi iqtisadi zonasının ətrafına düşüb

Şimali Koreya Yapon dənizinə ballistik raket atıb.

"Report"un "Kyodo" xəbər agentliyinə istinadən məlumatına görə, raket Yaponiyanın xüsusi iqtisadi zonasının yaxınlığına düşüb.

Agentliyin Yaponiya Müdafiə Nazirliyindəki mənbələrinin məlumatına görə, ərazidə gəmilərə və ya təyyarələrə ziyan dəyməsi barədə heç bir məlumat verilməyib. Yaponiya Sahil Mühafizəsi ərazidəki gəmiləri mümkün raket qalıqlarından uzaq olmağa və bu cür qalıqlar barədə dərhal səlahiyyətli orqanlara məlumat verməyə çağırıb.

Daha əvvəl Cənubi Koreya Silahlı Qüvvələrinin Qərargah Rəisləri Komitəsi şərqə doğru naməlum raketin atıldığını təsdiqləyib.

Bu, son bir həftə ərzində ikinci buraxılışdır - ötən cümə axşamı Pxenyan Yapon Dənizinə doğru qısa mənzilli raket atıb. Buraxılış son sınağı gələn həftə planlaşdırılan ABŞ-Cənubi Koreya birgə təlimləri fonunda baş tutub.