Makron İran-ABŞ gərginliyindən danışdı: "Münaqişə hələ bitməyib"

ABŞ və İsrailin İrana qarşı müharibəsi tərəflər arasında imzalanan memoranduma baxmayaraq, hələ tam başa çatmayıb.

Ens.az Oxu.az-a istinadən xəbər verir ki, bu barədə Fransa Prezidenti Emmanuel Makron "France 2" telekanalının efirində bəyan edib.

"Mən düşünmürəm ki, bu münaqişənin qəti şəkildə nizamlandığını söyləmək olar", - deyə Makron jurnalistin İranla bağlı münaqişənin ilkin yekunlarına qiymət vermək xahişini cavablandırarkən bildirib.

O qeyd edib ki, əldə olunan razılaşma Livana şamil olunan atəşkəs rejimini və Hörmüz boğazı vasitəsilə gəmilərin hərəkətinin bərpasını nəzərdə tutur: "60 gün keçdikdən sonra biz nüvə proqramı və ballistik raketlərlə bağlı hansı addımların atılacağını, həmçinin İranın həqiqətən də əvvəlkindən daha az təhlükəli olub-olmadığını müəyyən etməli olacağıq".

Xatırladaq ki, ABŞ və İran arasında münaqişənin dayandırılmasını nəzərdə tutan 14 bəndlik memorandum artıq imzalanıb.