Millət vəkili tələbələrlə görüşdü

Millət vəkili Qənirə Paşayeva Qərbi Kaspi Universitetində gənclərlə görüşüb.

Axar.az xəbər verir ki, universitetinin dəvəti ilə baş tutan görüşdə Atlas Araşdırmalar Mərkəzinin rəhbəri Elxan Şahinoğlu, “Regional hüquqi və iqtisadi maarifləndirmə” İB-nin sədri Arzu Bagirova və əməkdar müəllim Almaz Həsrət də iştirak edib.

Q.Paşayeva Azərbaycanın inkişafı istiqamətində gənclərin üzərinə böyük vəzifələr düşdüyünü deyib. Erməni diasporunun Azərbaycan əleyhinə təbliğat apardığını deyən millət vəkili bütün gəncləri sosial media üzərindən Azərbaycan əleyhinə təbliğat aparanlara qarşı ciddi mübarizəyə səsləyib.

Millət vəkili gəncləri daha çox mütaliə etməyə çağırıb:

“Ölkəmizin inkişafı üçün gənclərin savadlı, təhsilli, elmə və kitab oxumağa meyilli olması əsas şərtdir. İnsanın gələcəyində onun təhsili, bir peşə sahibi olması çox böyük önəm daşıyır. Gənclər Azərbaycan ədəbiyyatını daha geniş mütaliə etməlidir. Hansı peşənin sahibi olmasından asılı olmayaraq, hər bir insan öz ölkəsinin və millətinin tarixini də dərindən bilməlidir”.

Deputat görüşdə Dağlıq Qarabağ münaqişəsi, Ermənistanın işğal etdiyi Azərbaycan torpaqlarında törətdiyi soyqırımlar, vandalizm aktları, beynəlxalq təşkilatların ikili standartları ilə bağlı geniş məlumat verib.

Azərbaycanın işğal altında olan əraziləri barədə də danışan millət vəkili Aprel zəfərinin dosta və düşmənə bir mesaj olduğunu da xüsusilə vurğulayıb:

“Ordumuz düşmənə layiq olduğu cavabı verib və verir. Azərbaycan Ordusu düşmənə layiqli cavab vermək gücündədir. Hamımız ordunun könüllü əsgəriyik və bu gün gənclərimiz torpaqlarımızı işğaldan azad etmək üçün canlarını da verməyə hazırdırlar. Aprel döyüşləri də bunun ən önəmli zirvəsi idi ki, bu döyüşlərdən sonra bayrağımız Lələ Təpədə dalğalanır. Cocuq Mərcanlıdan olan məcburi köçkünlərimiz öz evlərinə dönüblər. Prezident İlham Əliyevin vurğuladığı kimi Lələ Təpədə dalğalanan bayrağımız yaxın vaxtlarda işğal altındakı ərazilərimizdə də dalğalanacaq”.

Q.Paşayeva eyni zamanda qadın haqlarının müdafiəsi, gender bərabərliyi, qızların təhsili, qadına qarşı zorakılıqla mübarizə istiqamətində uğurların əldə edilməsində dövlət siyasətinin önəmli yer tutduğunu bildirib.

Deputat Azərbaycanda bu istiqamətdə həllini gözləyən problemlər barədə də ətraflı məlumat verib.

O deyib ki, gender bərabərliyi, qadınların dövlətin və cəmiyyətin idarə olunmasında, o cümlədən biznesdə rolunun artırılmasına dəstək, qadınlara qarşı bütün növ zorakılıq hallarına qarşı kəskin mübarizənin aparılması Azərbaycan dövlətinin prioritetləri sırasındadır.