Naxçıvanda Prezidentin nümayəndəsinə yeni köməkçi təyin OLUNACAQ

Naxçıvan Muxtar Respublikasında Prezidentin səlahiyyətli nümayəndəsi, onun müavinləri və köməkçisi dövlət qulluqçusu statusu daşıyan şəxslərin dairəsinə daxil edilir və dövlət qulluğunun təsnifatı qanunvericilikdə yenidən tənzimlənir.

Ens.az xəbər verir ki, bununla bağlı Prezident İlham Əliyev "Dövlət qulluğu haqqında" Qanunda dəyişiklik edilməsi barədə Qanun imzalayıb.

Dəyişikliyə əsasən, qanunun 2.2-ci maddəsinə və 33-4-cü maddəsinin "Qeyd" hissəsinə Naxçıvan Muxtar Respublikasında Prezidentin səlahiyyətli nümayəndəsi və onun müavinləri əlavə olunub. Eyni zamanda, Naxçıvan Muxtar Respublikasında Prezidentin səlahiyyətli nümayəndəliyi qanunun 8.1.2-ci maddəsinə uyğun olaraq müvafiq icra hakimiyyəti orqanının statusuna inteqrasiya edilir.

Qanuna edilən digər əlavə ilə dövlət qulluğu vəzifələrinin təsnifatına yeni bənd daxil edilib. Yeni 11.1.4.16-1-ci maddəyə əsasən, Naxçıvan Muxtar Respublikasında Prezidentin səlahiyyətli nümayəndəsinin köməkçisi vəzifəsi dövlət qulluğu vəzifələrinin təsnifat siyahısına salınacaq. Bu tənzimləmə çərçivəsində qanunun 11.1.2.5-ci, 11.1.2.12-ci və 11.1.4.2-ci maddələri ləğv edilir.

Qanun 2026-cı il iyulun 1-dən qüvvəyə minəcək.