Nazir: Kitabxana şəbəkəsi əhalinin yalnız 35 faizinin tələbatını ödəyir

Kitabxana şəbəkəsi əhalinin yalnız 35 faizinin tələbatını ödəyir.

"Ens.Az" xəbər verir ki, bunu Azərbaycanın mədəniyyət naziri Adil Kərimli Milli Məclisin Mədəniyyət komitəsinin "Kitabxana sisteminin mövcud vəziyyəti və inkişaf perspektivləri" mövzusunda keçirdiyi ictimai müzakirə zamanı deyib.

Onun sözlərinə görə, bu gün Mədəniyyət Nazirliyi bütün ölkə vətəndaşlarının, eyni zamanda, ölkəyə gələn qonaqların, xarici vətəndaşların kitaba əlçatanlığının təmin edilməsini əsas hədəf kimi qarşısına qoyub:

"Bu hədəfə çatmaq üçün kitabxananın xidmət şəbəkəsi sistemi, yerləşməsi formalaşdırılır. Düzdür, hazırda infrastruktur baxımından kifayət qədər bina var. Amma onlar bu sahədə tələbatı tam təmin edə bilirmi? Xeyr, ərazi baxımından lokallaşması, yerləşməsi prinsipini əsas götürsək, təsisatlar bütövlükdə bu sahədəki tələbatın 35 faizini yerinə yetirə bilir".

Nazir ölkə əhalisinin 95 faizinin kitabxanaya əlçatanlığını təmin etməyi hədəflədiklərini də söyləyib:

"Gələcək hədəfimiz 100 faiz kitabxanaya əlçatanlığı təmin etməkdir . Bir sözlə, Bakıdakı universitetlərdəki əlçatanlıq regionalardakı universitetlərdə də eyni olmalıdır".

A.Kərimli bildirib ki, kitabxana fondlarında toplanan kitabların cəmiyyətə nə qədər faydalı olması sual altındadır:

"Kitabxana sisteminin inkişafı yalnız infrastrukturla deyil, həm də keyfiyyətli məzmunun formalaşdırılması ilə bağlıdır. Son üç ildə kitabxana fondlarının zənginləşdirilməsi məqsədilə nəşrlərin satın alınması üzrə xüsusi komissiya fəaliyyət göstərir və dövlət hər il bu istiqamətə 600 min manata yaxın vəsait ayırır. Monitorinqlər göstərdi ki, kitabxana fondlarında toplanan bütün nəşrlər cəmiyyət üçün eyni dərəcədə faydalı deyil. Buna görə də əsas diqqət elmi və elmi-kütləvi ədəbiyyatın alınmasına yönəldilib".