Obrenoviç: "Azərbaycan Serbiyanın enerji təhlükəsizliyinin təmin edilməsində mühüm tərəfdaşdır"

Serbiya enerji təhlükəsizliyinin təmin edilməsində Azərbaycanı mühüm tərəfdaş hesab edir.

Bu barədə “Report”a enerji hüququ və siyasəti üzrə ekspert Straxinya Obrenoviç bildirib.

Onun sözlərinə görə, Azərbaycanın dünya enerji bazarında artan rolu Qərbi Balkan regionunun yeni təchizat mənbələrinə yönəlməsinə imkan yaradır.

"Son illərdə Serbiya ilə Azərbaycan arasında əməkdaşlığın aktivləşməsi tendensiyası müşahidə olunur ki, bu da iki ölkə arasında mövcud olan çox yaxşı siyasi münasibətlərlə şərtlənib", - S. Obrenoviç bildirib.

Ekspertin sözlərinə görə, Balkan regionu qaz təchizatını şaxələndirməkdə maraqlıdır, çünki ölkələr avrointeqrasiya üçün Rusiya mənbələrindən asılılığını azaltmalıdır.

Serbiyanın enerji təchizatının dayanıqlılığını artıra biləcəyi layihələrdən danışan Obrenoviç Azərbaycanla birgə Niş şəhərində tikiləcək qaz elektrik stansiyasını qeyd edib. "Enerji keçidi elektrik enerjisi istehsalında hələ də kömürə etibar edən Qərbi Balkan ölkələri üçün xüsusilə çətindir. Layihə (qaz elektrik stansiyasının tikintisi) etibarlı elektrik və istilik təchizatı məsələsi ortaya çıxdığı zaman yaranıb", - deyə, ekspert vurğulayıb.

Xatırladaq ki, Serbiya Prezidenti Aleksandr Vuçiç ötən ilin noyabrında Bakı ilə Belqrad arasında enerji sahəsində əməkdaşlıq və qaz elektrik stansiyasının tikintisi ilə bağlı danışıqlar prosesinin əhəmiyyətini qeyd edib.

Öz növbəsində, Serbiyanın mədən və energetika naziri Dubravka Cedoviç Handanoviç dekabrda Belqradda Azərbaycanın iqtisadiyyat nazirinin müavini Anar Axundov və Azərbaycan Dövlət Neft Şirkətinin (SOCAR) nümayəndə heyəti ilə görüşdə Serbiya tərəfinin yaxın gələcəkdə ölkədə qaz elektrik stansiyasının tikintisinə dair saziş imzalamaq planlarından danışıb.