![OPEC ölkələri mayda "OPEC+" üzrə öhdəliklərin 84%-ni yerinə yetirib](https://ens.az/images/news/b888a84205b8cedb72689e09b47e86b6.jpg)
OPEC ölkələri mayda "OPEC+" üzrə öhdəliklərin 84%-ni yerinə yetirib
Bu ilin may ayında 10 OPEC (Neft İxrac Edən Ölkələr Təşkilatı) ölkəsi "OPEC+" (OPEC və təşkilata daxil olmayan ölkələri əhatə edən neft istehsalının azaltması üzrə təşəbbüs) razılaşması üzrə planı 84% yerinə yetirib.
"APA-Economics"in OPEC-in aylıq hesabatına istinadən verdiyi məlumata görə, may ayında "OPEC+" razılaşmasında iştirak edən 10 OPEC ölkəsi (İran, Liviya və Venesuela hasilatı azaltmaqdan azaddır – red.) neft hasilatını baza səviyyəsindən gündə 5,12 mln. barel azaldıb.
Beləliklə, OPEC ölkələri razılaşma üzrə öhdəliklərini 84% (gündəlik kvota 6,1 mln. barel) yerinə yetirib.
Qeyd edək ki, aprel ayının 12-də "OPEC+" ölkələri nazirlərinin 10-cu iclasında qəbul edilmiş tarixi razılaşma ümumilikdə gündəlik xam neft hasilatının may-iyunda 9,7 mln. barel, iyul-dekabrda 7,7 mln. barel, 2021-ci ildən 2022-ci ilin aprel ayının sonuna qədər 5,8 mln. barel azaldılmasını nəzərdə tuturdu.
Bununla yanaşı, OPEC-in üzv və qeyri-üzv ölkələrinin nazirlərinin iyunun 6-da video-konfrans formatında keçirilən 11-ci iclasında gündəlik neft hasilatının 9,7 mln. barel azaldılması ilə bağlı mövcud kvotanın müddətinin daha 1 ay, iyulun sonunadək uzadılması barədə qərar qəbul olunub.
İclasda əldə edilən razılığa əsasən, iyulda gündəlik neft hasilatını OPEC ölkələri 6,084 mln. barel, qeyri-OPEC ölkələri isə 3,616 mln. barel azaldacaq. Səudiyyə Ərəbistanı, BƏƏ, Küveyt və Oman isə gündəlik neft istehsalını iyun ayında əlavə olaraq, təxminən, 1,2 mln. barel həcmində ixtisar edəcəklər. Yeni "Əməkdaşlıq Bəyannaməsi"nə uyğun olaraq Azərbaycan may-iyun ayları üzrə 164 min barrel həcmindəki öhdəliyini bu müddət ərzində də yerinə yetirərək, gündəlik xam neft istehsalını 554 min barel səviyyəsində saxlamalıdır.
Şərhlər
Şərhləri göstər Şərhləri gizlət