“Orduya çağırış ildə 2 dəfə olsun”

Milli Məclisdə hərbi xidmətə çağırışın müddətinin uzadılması barədə dəyişikliklər müzakirə olunub.

“Qafqazinfo”nun verdiyi xəbərə görə, deputat Ziyafət Əsgərov deyib ki, bu virusu hərbi hissələrə daşımaq olmaz: “Virus bir hərbi hissəyə keçsə, ordunun vəziyyətini düşünmək istəmirəm. Yadınızdadırsa, Çin dəmir intizamla bu virusla mübarizəni tənzimlədi. Amma Avropada rahat həyat tərzi vəziyyətin daha da pisləşməsinə səbəb oldu. Koronavirus müharibəsində vətəndaşlar müəsuliyyətini beşqat artırmalıdır. Bəli, bu müharibədir, koronavirus dünyaya müharibə elan edib. Bizim artıq iki düşmənimiz var, biri də Ermənistandır. Dəmir nizam-intizam olmasa, vəziyyət çox pis olacaq. Bəziləri düşünür ki, bu adi qripdir də, gəlib keçəcək. Xeyr, nizam-intizam olmasa, gəlib keçməyəcək”.

Siyavuş Novruzov çıxışında deyib ki, artıq Azərbaycanın iki yox, 3 düşməni var: “İkisini Ziyafət müəllim dedi. Amma üçüncü də sapı özümüzdən olan baltalardır. Xaricdə oturub internetdə Azərbaycan dövlətinin əleyhinə təbliğat aparırlar. Öz olduqları ölkədə evdən çölə çıxa bilmirlər, buradakı vətəndaşlara çağırış edirlər. Bəzi təkliflərim də var, dünyanın heç bir yerində 4 dəfə çağırış yoxdur, hər yerdə iki dəfədir – yaz və payız çağırışı. O vaxt orduda insanlar çatışmırdı, tələbat var idi. Amma indi əhalinin sayı da artıb, ordunun şəxsi heyəti də. Biz bu məsələni də qanuna dəyişiklik edib qəbul etməliyik. İndi bizə 400 nəfər şikayət edir, onlardan 350-si tələb edir ki, məni niyə aparmırlar?!”