Övladını Azərbaycan bölməsinə keçirdi, məktəb təsdiqləmədi - Gəncədə narazılıq

Gəncə şəhərində valideyn övladının rus dili bölməsindən Azərbaycan dili bölməsinə keçirilməsi ilə bağlı narazılığını bildirib.

Bu barədə Oxu.Az-ın qaynar xəttinə (+994 55 224-12-12) müraciət daxil olub.

Valideynin sözlərinə görə, övladı qanuni qaydada, portal vasitəsilə M.Mehdizadə adına 4 nömrəli xarici dillər təmayüllü məktəb-liseyin rus dili bölməsindən Azərbaycan dili bölməsinə keçirilib. Lakin məktəb rəhbərliyinin keçidi təsdiqləməməsindən sonra şagird yenidən rus bölməsində təhsil almağa məcbur olub.

Valideyn iddia edib ki, məktəbin rəhbəri onun övladının Azərbaycan dili bölməsində düşdüyü sinfin güclü və nüfuzlu sinif olduğunu və övladının göstəricilərinin zəif olması səbəbindən həmin sinfə qəbul edilməyəcəyini bildirib.

Valideyn məsələ ilə bağlı aidiyyəti üzrə müraciət etdiyini, lakin problemin həlli istiqamətində lazımi tədbirlərin görülmədiyini iddia edib.

Oxu.Az-ın sorğusuna cavab olaraq Gəncə-Daşkəsən Regional Təhsil İdarəsindən bildirilib ki, hazırda şagirdlərin elektron yerdəyişməsi portalı aktiv deyil.

"Gəncə şəhəri M.Mehdizadə adına 4 nömrəli xarici dillər təmayüllü məktəb-liseyin rus bölməsinin 4-cü sinfində təhsil alan şagirdin həmin məktəbin Azərbaycan bölməsində digər sinfə yerdəyişməsi ilə bağlı sorğunuza cavab olaraq bildiririk ki, hazırda şagirdlərin elektron yerdəyişməsi portalı aktiv deyil.

Portal aktivləşdirildikdən sonra valideyn tərəfindən şagirdin yerdəyişməsi ilə bağlı elektron qaydada müraciət edilə bilər", - deyə məlumatda bildirilib.