Paşinyan Azərbaycanla sülhün əleyhinə çıxan qüvvələrə qarşı mübarizə aparmağa çağırdı

Ermənistanın baş naziri Nikol Paşinyan parlamentdə Bakı ilə İrəvan arasında normallaşmanın əleyhinə çıxan siyasi qüvvələrə qarşı mübarizə aparmağa çağırıb.

Oxu.Az Ermənistan KİV-ə istinadən xəbər verir ki, baş nazir bu barədə parlamentdəki çıxışı zamanı bəyan edib.

"İndi "üçbaşlı müharibə partiyası" adlandırılan qüvvə Azərbaycanla sülh sazişini şübhə altına qoyur. Məlum olur ki, Ermənistan parlamentində sülh arxitekturasını qəbul etməyən bir qüvvə var. Bu, təhdidlər yaradır və birbaşa reaksiyaları təhrik edir. Biz bu səbəb-nəticə əlaqələrini görməli və onlara müqavimət göstərməliyik", - deyə baş nazir vurğulayıb.

Paşinyan "üçbaşlı müharibə partiyası" dedikdə üç müxalif siyasi qüvvəni nəzərdə tutur: "Güclü Ermənistan", "Ermənistan" bloku və "Çiçəklənən Ermənistan".

O əlavə edib ki, seçkinin nəticələrinə əsasən parlamentə daxil olan "Güclü Ermənistan" və "Ermənistan" bloklarının üzvləri casus şəbəkəsinin nümayəndələridir və seçkidə bu səsləri seçiciləri ələ almaq yolu ilə qazanıblar.

"Bu casus şəbəkəsinin kökü kəsilməlidir. Əks təqdirdə, onlar münaqişəni yenidən alovlandırmaq, müharibə başlatmaq üçün hər şeyi edəcəklər. Hazırda biz vəziyyətin öhdəsindən əminliklə gəlirik, lakin xalqımız da bunu başa düşməlidir", - deyə Ermənistanın baş naziri bildirib.

Paşinyan, həmçinin qeyd edib ki, Ermənistanın gələcəyinə yönəlmiş hər hansı bir təhdid elə mənbəyindəcə aradan qaldırılmalıdır.