Paşinyan Ermənistan hökumətinin sülhlə bağlı hədəflərini açıqladı

"Azərbaycanla sülh sazişinin 2031-ci ilə qədər imzalanması və ratifikasiyası Ermənistan hökumətinin başlıca hədəflərindəndir".

Oxu.Az erməni mediasına istinadən xəbər verir ki, baş nazir Nikol Paşinyan bunu hökumətin iclası zamanı deyib.

Onun sözlərinə görə, Azərbaycanla sülh sazişinin imzalanması həm bütövlükdə hökumət, həm də şəxsən onun üçün ən vacib məsələlər sırasındadır:

"Mən şəxsən özüm üçün konkret qrafik qoymuşam, məqsəd qoymuşam - 2031-ci ilə qədər məsələnin həllinə nail olmaq. Təbii ki, bu, hökumətin və bütövlükdə siyasi komandamızın da vəzifəsidir. Lakin mən baş nazir kimi, bunu həm də öz şəxsi gündəmim baxımından çox mühüm hesab edirəm".

O həmçinin əlavə edib ki, belə bir imkanı gördüyü üçün bu mövzunu qaldırıb, əks təqdirdə buna toxunmazdı.

Xatırladaq ki, 8 avqust 2025-ci ildə Vaşinqtonda ABŞ Prezidenti Donald Trampla keçirilən üçtərəfli görüşün nəticələrinə əsasən, Azərbaycan lideri İlham Əliyev və Ermənistan Baş naziri Nikol Paşinyan Bakı ilə İrəvan arasında sülh nizamlanması və Azərbaycanın əsas hissəsi ilə Naxçıvan arasında nəqliyyat kommunikasiyasının yaradılması barədə birgə bəyannamə imzalayıblar. Bu layihə "Beynəlxalq sülh və rifah naminə Tramp marşrutu" (TRIPP) adını alıb.