Pezeşkian ABŞ ilə razılaşmanın niyə pozulmasından danışdı

"İran eskalasiyaya, müharibəyə və ya digər ölkələr üzərində ağalıq etməyə can atmır. Lakin Yaxın Şərq regionundakı ABŞ bazalarından hücumlar olacağı təqdirdə özünümüdafiəni öz hüququ hesab edir".

Oxu.Az "Azad İran" "Telegram" kanalına istinadən xəbər verir ki, bu barədə İran Prezidenti Məsud Pezeşkian vəzifəsinin icrasına başlamasının ikinci ildönümü münasibətilə xalqa müraciətində bəyan edib.

Dövlət başçısının sözlərinə görə, İslam Respublikasına qarşı xarici təzyiq və təhdidlərə son qoyulacağı təqdirdə regional gərginliyin davam etməsi üçün əsaslar tamamilə aradan qalxacaq.

Beynəlxalq öhdəliklərin yerinə yetirilməsinə toxunan prezident qeyd edib ki, Tehran Vaşinqtonun addımlarına adekvat cavab verəcək və qarşılıqlılıq prinsipi əsasında hərəkət edəcək.

Bununla yanaşı, Pezeşkian ilk dəfə olaraq bəndləri praktiki olaraq hər iki tərəfin razılaşdırdığı mühüm razılaşmanın baş tutmamasının təfərrüatlarını açıqlayıb.

O qeyd edib ki, sənədin legitimliyini artırmaq üçün onun şəxsən Tramp tərəfindən imzalanması gözlənilirdi. Lakin prezidentin sözlərinə görə, 24 saatdan da az müddətdə danışıqların gedişatı tamamilə dəyişib və razılaşma əldə olunmayıb. İran lideri vurğulayıb ki, sövdələşmə üzərində iş aparılarkən ilkin mərhələdə ölkə rəhbərliyi daxilində tam razılıq olub.

Pezeşkian həmçinin hökumətlə hərbi dairələr arasında mümkün fikir ayrılıqları barədə şayiələri təkzib edərək silahlı qüvvələrin dəstəklənməsini siyasi rəhbərliyin birbaşa vəzifəsi adlandırıb.

Bundan əlavə, o, hakimiyyət strukturları daxilində parçalanma ilə bağlı bütün fərziyyələri, eləcə də mümkün istefası barədə yayılan şayiələri rədd edib.