“Prezident bir çox ünvanlara ciddi mesajlar göndərdi” - Əli Əhmədov

Ə.Əhmədov vurğulayıb ki, ölkə başçısı Soçidə bu bəyanatı səsləndirməklə bir çox ünvanlara çox ciddi mesajlar göndərib: "Bunun birincisi Ermənistan cəmiyyəti, rəhbərliyidir. İkincisi beynəlxalq təşkilatlardır ki, Dağlıq Qarabağ münaqişəsinin nizama salınması ilə əlaqədar vasitəçilik missiyasını üzərlərinə götürüblər. Bu ünvanlardan digəri Azərbaycan cəmiyyətidir. Azərbaycan cəmiyyətinə çatdırılan mesajın mahiyyəti milli ruhun yüksəldilməsindən ibarətdir. Eyni zamanda, bütün cəmiyyətin birliyini təmin edən ideyanın formalaşması məqsədi güdülmüşdür. Hesab edirəm ki, münaqişə nizama salınana qədər Azərbaycan cəmiyyətində əsas birləşdirici ideya "Qarabağ Azərbaycandır" ideyası olmalıdır".

Münaqişənin həlli ilə bağlı hazırkı duruma münasibət bildirən YAP sədrinin müavini qeyd edib ki, danışıqlar prosesində iştirak edən tərəflər bəllidir: "Bu tərəflərdən biri Ermənistandır. Ermənistanın konstruktiv mövqeyinin olması danışıqlar prosesinin normal aparılmasının vacib şərtlərindən biridir. Əgər Ermənistan qeyri-konstruktiv mövqeyini davam etdirəcəksə, beynəlxalq təşkilatlar, vasitəçilər danışıqlar prosesi ilə bağlı mövqeyində ciddi düzəlişlər etməlidir".