Qanun layihəsi niyə geri qaytarılmışdı?

Azərbaycan Prezidentinin köməkçisi − Prezident Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov Prezident İlham Əliyevin imzalanmadan yenidən Milli Məclisə göndərdiyi qanun layihəsindəki dəyişikliklərdən danışıb.

Ens.Az xəbər verir ki, parlamentin bugünkü iclasında Prezidentin etirazı ilə geri qaytarılmış "Azərbaycan Respublikasının Vergi Məcəlləsində, Azərbaycan Respublikasının Miqrasiya Məcəlləsində, "Sosial sığorta haqında", "Gömrük tarifi haqqında", "Lisenziyalar və icazələr haqqında" və "Dövlət satınalmaları haqqında" qanunlara dəyişiklik layihəsi müzakirə edilib.

O bildirib ki, 2026-cı il 14 iyul tarixində Milli Məclis tərəfindən qəbul olunmuş Rəqəmsal texnologiyalar sahəsi subyektləri üçün bir sıra güzəşt və imtiyazlar nəzərdə tutan 453 nömrəli qanun Azərbaycan Respublikası Prezidenti tərəfindən Konstitusiyanın 110-cu maddəsinə uyğun olaraq Milli Məclisə geri qaytarılıb:

"Bu müddət ərzində həmin qanun aidiyyəti dövlət orqanları ilə birlikdə təkrar müzakirə olunmuş və təkmilləşdirilərək Milli Məclisin müzakirəsinə təqdim edilmişdir. Qanun layihəsinin yenidən baxılmaq üçün Milli Məclisə qaytarılması onun müddəaların təkmilləşdirilməsinə, dövlət dəstəyinin hədəflərinin və tətbiq mexanizmlərinin dəqiqləşdirilməsinə imkan yaratmışdır. Təqdim olunan layihə məhz bu çağırışa cavab verməyə yönəlib. Layihənin konseptual mahiyyəti ayrı-ayrı vergi və sosial güzəştlərə məhdudlaşmır. O, rəqəmsal ekosistem üçün vacib olan mütəxəssis, investor, tədqiqat və bazar həlqələrinin vahid təşviq yanaşmasında birləşdirir və innovasiyanın yeni məhsul və xidmətlərə çevrilməsinə şərait yaratmağı hədəfləyir. Qanunun müzakirəsi, həmçinin Milli Məclisin İqtisadi siyasət, sənaye və sahibkarlıq komitəsində də keçirilmiş və komitənin müvafiq rəyi hazırlanıb. Qanunun təkmilləşdirilmiş redaksiyası tərəfinizdən dəstəklənir və hörmətli millət vəkillərinin bu redaksiyanı dəstəkləməyə çağırıram".