"Qərb liberalları bu dəliliyə son qoymalıdır" - Vensdən Fransadakı iğtişaşlara REAKSİYA

ABŞ-nin Vitse-prezidenti C.D. Vens Qərb liberallarının immiqrasiya siyasətini kəskin tənqid edərək, Fransada baş verən son iğtişaşlar və tarixi abidələrin dağıdılması fonunda diqqətçəkən bəyanatla çıxış edib.

Ens.az Redaktor.az-a istinadən xəbər verir ki,, bu barədə amerikalı siyasətçi media hesabında paylaşım edib.

Vens bildirib ki, Qərb liberalları müxtəliflik və şəfqət adı altında Üçüncü Dünya ölkələrindən olan immiqrantların Fransaya və digər dövlətlərə axınına şərait yaradıblar, lakin bunun gətirəcəyi fəsadları və assimilyasiya problemlərini görməzdən gəliblər. Vitse-prezidentin sözlərinə görə, liberallara bu addımın ağır nəticələri barədə xəbərdarlıq edilsə də, onlar xəbərdarlıqlara məhəl qoymayıblar.

"Dua edirəm ki, gözəl insanları olan gözəl bir ölkə olan Fransa daha çox abidə məhv edilməzdən əvvəl bu dəliliyi dayandırsın", – deyə Vens vurğulayıb.

Qeyd edək ki, Fransada kütləvi etirazlar sentyabrın sonlarında orta məktəb şagirdlərinin təhsil sistemindəki problemlərə qarşı nümayişləri ilə başlayıb və qısa müddətdə bütün ölkəni bürüyüb. Oktyabrın 17-də yarım milyondan çox insan – gənclər, həmkarlar ittifaqlarının üzvləri və işçilər yanacaq qiymətlərinin artmasına və alıcılıq qabiliyyətinin aşağı düşməsinə etiraz olaraq küçələrə çıxıb.

İğtişaşlar zamanı fəallar Fransanın cənub-qərbindəki Limoj şəhərində yerləşən tarixi bələdiyyə binasını yandırıblar. Yanğın nəticəsində şəhərin əsas simvollarından sayılan zəng qülləsi uçub. Fransa Prezidenti Emmanuel Makron isə ölkədə iğtişaş törədənlərin və abidələrə zərər vuranların ən sərt şəkildə cəzalandırılacağını bəyan edib.