Ramzan Kadırov ABŞ-dan anasına qarşı tətbiq olunan sanksiyaların ləğvini tələb edib

Rusiya Federasiyasının Çeçenistan Respublikasının rəhbəri Ramzan Kadırov ABŞ-dan anası Aymani Kadırova qarşı tətbiq edilən sanksiyaların ləğvini istəyib.

Ens.az Report.az-a istinadən xəbər verir ki, o, bununla bağlı müraciətini telegram kanalında yayıb.

R.Kadırov bildirib ki, ABŞ və Qərbin məntiqsiz sanksiya qərarlarına təəccüblənməyi artıq dayandırıb. O xatırladıb ki, anası yalnız dünyanın bildiyi xeyriyyəçilik fəaliyyəti ilə məşğuldur.

“Anama qarşı sanksiyaları aradan qaldırmasanız, Uca Allaha and içirəm ki, bu məsələni elə-belə qoymayacağam. Həyat yoldaşıma, uşaqlarıma sanksiya tətbiq edəndə susdum. Amma indi sizə deyirəm, əgər anama qarşı sanksiyaları ləğv etməsəniz, sizi əmin edirəm ki, bu, sizə baha başa gələcək”, - Çeçenistan rəhbəri vurğulayıb.

Qeyd edək ki, ABŞ avqustun 24-də R.Kadırovun anasına qarşı sanksiyalar qoyub. Rusiya Prezidenti Vladimir Putin avqustun 2-də Aymani Kadırovanı “Şərəf” ordeni ilə təltif edib.