Rusiya Xerson və Zaporojyeyə zərbələr endirib: ölənlər və yaralananlar var

Rusiyanın Ukraynanın Xerson və Zaporojye vilayətlərinə endirdiyi zərbələr nəticəsində 4 nəfər həlak olub, 22 nəfər yaralanıb.

Ens.az Report.az-a istinadən xəbər verir ki, bu barədə məlumatı həmin vilayətlərin Hərbi administrasiyalarının rəhbərləri Aleksandr Prokudin və İvan Fyodorov, eləcə də Xarkov vilayət hərbi administrasiyasının başçısı Oleq Sinequbov açıqlayıblar.

Prokudinin sözlərinə görə, Rusiya qoşunları Xerson vilayətini atəşə tutub, nəticədə 3 nəfər həlak olub, daha 19 nəfər yaralanıb.

Rusiya qoşunları Zaporojye vilayətində gün ərzində 52 yaşayış məntəqəsinə 900-dən çox zərbə endirib. İ.Fyodorovun sözlərinə görə, hücumlar nəticəsində 1 nəfər həlak olub, daha 3 nəfər isə yaralanıb.

Öz növbəsində O.Sinequbov bildirib ki, ötən sutka ərzində Rusiya Silahlı Qüvvələri müxtəlif növ raketlər, reaktiv yaylım atəşi sistemləri, idarə olunan aviabombalar və pilotsuz uçuş aparatları tətbiq etməklə Xarkova və vilayətin 14 yaşayış məntəqəsinə zərbələr endirib.

Onun sözlərinə görə, regiona hücumlar nəticəsində ölənlər və xəsarət alanlar var. Onların dəqiq sayı dəqiqləşdirilir.