Şahmar Mövsümov: "Orta müddətdə neftin qiymətinin hazırkı səviyyədə qalması daha çox ehtimal olunur"

Azərbaycan Respublikası Prezidentinin köməkçisi – Azərbaycan Respublikası Prezidentinin Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov neft bazarı və neftin qiyməti ilə bağlı proqnozunu açıqlayıb.

Ens.az xəbər verir ki,Ş. Mövsümov APA-ya açıqlamasında deyib ki, neftin qiyməti tələbat və istehsaldan asılıdır və bu gün pandemiya ilə əlaqədar istehlak, neftə tələbat azalıb: "Buna reaksiya olaraq "OPEC+" ölkələri gündəlik istehsalı təxminən 12 milyon barel azaldıb. Bu, bazarda qiymətin tarazlaşmasına imkan verib. Bu ilin sonuna, gələn il üçün neftin qiyməti ilə əlaqədar proqnoz vermək üçün istehlak və istehsalın necə dəyişəcəyinə baxmalıyıq. Növbəti mərhələdə pandemiya bu şəkildə davam etsə, deməli, istehlak, yəni tələb artmayacaq. Ancaq pandemiya səngisə, insanlar virusla yaşamağa öyrəşdikcə, tələbat da yavaş-yavaş artacaq. Bu da nəticə etibarilə neftin qiymətinin artmasına gətirib çıxaracaq. Eyni zamanda istehsalda da bir az ehtiyatımız var, o ehtiyatlarda da artımımız olacaq".

Ş. Mövsümov onu da qeyd edib ki, neftin qiyməti ilə bağlı uzunmüddətli dövr üçün hər hansı proqnoz vermək çətindir: "Amma orta müddətdə neftin qiymətinin hazırkı səviyyədə qalması daha çox ehtimal olunur".

Qeyd edək ki, bu günə "Brent" və WTI etalon neft markalarının bir barelinin qiyməti müvafiq olaraq 43,45 və 41,05 ABŞ dolları səviyyəsində qərarlaşıb.

Xatırladaq ki, ABŞ-ın Energetika Nazirliyi yanında Energetika İnformasiyası Agentliyinin (EIA) son proqnozlarına əsasən, bu il "Brent" markalı neftin qiyməti orta hesabla 40,5 dollar (bir barel üçün) təşkil edəcək, gələn il isə bu göstərici 50 dollar səviyyəsində olacaq.

WTI markalı neftin orta qiyməti Agentlik tərəfindən 2020-ci il üçün 37,55 dollar səviyyəsində proqnozlaşdırılır. Gələn il bu göstəricinin 45,7 dollar səviyyəsində olacağı ehtimal edilir.