Spiegel: Ağ ev administrasiyası üzvləri haqqında məlumatlar internetə sızıb

ABŞ Prezidenti Donald Trampın komandasından olan yüksəkvəzifəli siyasətçilərin şəxsi məlumatları internetə sızdırılıb.

"Ens.az" “Report”a istinadla  xəbər verir ki,bu barədə alman nəşri “Der Spiegel” öz araşdırmasına istinadən məlumat yayıb.

Jurnala məlum olub ki, internetdə açıq şəkildə telefon nömrələri, e-poçt ünvanları və hətta parolları tapmaq mümkündür. Qeyd olunub ki, ABŞ prezidentinin milli təhlükəsizlik üzrə müşaviri Mayk Uolts, kəşfiyyat rəhbəri Tulsi Qabbard və Pentaqon rəhbəri Pit Heqsetin məlumatları internetə sızdırılıb.

Məqalədə aydınlıq gətirilib ki, bəzi elektron ünvanlar hələ də istifadə olunur, xüsusilə də onlar siyasətçilərin sosial şəbəkələrdəki və tətbiqlərdəki hesabları ilə əlaqəlidir.

Materialın müəllifləri vurğulayıblar ki, Amerika Birləşmiş Ştatlarında informasiya təhlükəsizliyinin təmin edilməsi ilə bağlı ciddi problemlər var və bu, “The Atlantic” jurnalisti Ceffri Qoldberqin əlavə edildiyi “Signal” mesencerində husilərə qarşı hərbi əməliyyatın müzakirəsi ilə bağlı qalmaqal fonunda üzə çıxıb.

Jurnalist Qoldberq martın 24-də bildirib ki, Uolts onu “Signal” mesencerində "Husilər PK yaxın qrup” adlı çata əlavə edib və burada ABŞ administrasiyasının nümayəndələri Yəməndəki husilərə qarşı zərbələri müzakirə ediblər.