Şübhəli amerikalılar vətəndaşlıqdan məhrum edilirlər

ABŞ hökuməti şübhəli amerikalıları vətəndaşlıqdan məhrum etməyə başlayıb. Söhbət ABŞ-da doğulduğunu sübut edə bilməyən amerikalılardan gedir. 

Oxu.Az xəbər verir ki, bununla bağlı “The Washington Post” məlumat yayıb. 

Bir çox hallarda Meksika ilə sərhəddə doğulan insanların sənədləri yoxlanılır və götürülür. Onların yalan yollarla doğum haqqında sənəd əldə etdiyi əsas göstərilir və bildirilir ki, onlar, əslində, ABŞ vətəndaşları deyillər. 

Nəşr bildirib ki, bəzi hallarda şübhəlilər həbsə göndərilir və orada qeyri-leqal miqrant kimi saxlanılır, sonra isə deportasiya edilir. Digərləri isə Meksikadan ABŞ-a qayıda bilmirlər, çünki sərhəddə onların pasportları müsadirə edilir. 

Sənədləri müsadirə edilən şəxslərdən burada doğulması, hansı bağçaya və məktəbə getməsi, eləcə də, uşaq vaxtı yaşadığı yerlər haqqında sübutlar istənilir. Ancaq bu sübutlar təqdim edildikdən sonra da onlara pasportların qayıdacağı ilə bağlı zəmanət verilmir.

ABŞ miqrasiya qanunlarına əsasən, qeyri-leqal miqrantlar əvvəlcə Ədliyyə Nazirliyinin əməkdaşlarına təqdim olunur, daha sonra isə məhkəməyə göndərilir. 

Apreldə ABŞ ədliyyə naziri Ceff Seşns miqrantlara qarşı “sıfır tolerantlıq” siyasətinin başlandığını bildirib.