Suriya və Liviya üzrə intensiv təmaslar: Zaxarova Türkiyə ilə ortaq fəaliyyətdən danışdı

Rusiya Xarici İşlər Nazirliyinin təmsilçisi Mariya Zaxarova Türkiyə ilə dialoqun beynəlxalq təhlükəsizliyin möhkəmləndirilməsinə töhfə verdiyini bildirib və Türkiyəni həm ikitərəfli, həm də beynəlxalq miqyasda konstruktiv tərəfdaş kimi xarakterizə edib.

Oxu.Az "Anadolu Ajansı"na istinadən xəbər verir ki, bu açıqlamanı M.Zaxarova Moskvada həftəlik mətbuat konfransında səsləndirib.

Rusiya-Türkiyə münasibətlərinə toxunan XİN təmsilçisi Türkiyənin Rusiyanın qonşusu olduğunu vurğulayaraq deyib: "Türkiyə həm ikitərəfli, həm də beynəlxalq gündəmdə geniş məsələlər üzrə konstruktiv dialoq apardığımız tərəfdaşımızdır. İki ölkə arasında layihələr hər iki tərəfin rifahına töhfə verir. Rusiya ikitərəfli əməkdaşlığın inkişafına ardıcıl yanaşma nümayiş etdirir".

M.Zaxarova təbii qaz və nüvə enerjisi sahələrində əməkdaşlıq məsələlərini də vurğulayıb. O bildirib ki, "Mavi axın" təbii qaz boru kəməri problemsiz işləyir.

"Türk axını" təkcə Türkiyəyə deyil, həm də Avropanın bir çox ölkəsinə qaz tədarük edir. "Akkuyu" atom elektrik stansiyası layihəsi Türkiyədə nüvə enerjisi sektorunun inkişafına töhfə verib", - deyə o əlavə edib.

Yaxın Şərq, Suriya, Liviya və Əfqanıstan kimi regional məsələlərdə Türkiyə ilə intensiv təmasların davam etdiyini qeyd edən M.Zaxarova bildirib: "Əminik ki, Rusiya və Türkiyə arasında intensiv dialoq ortaq Qara dəniz bölgəsinin və beynəlxalq təhlükəsizliyin möhkəmləndirilməsinə əhəmiyyətli dərəcədə töhfə verir və Yaxın Şərq məsələlərinə balanslı həll yollarının tapılmasına kömək edir".