“Şuşa Azərbaycan xalqının sarsılmaz iradəsinin və tarixi qələbəsinin rəmzidir”

“Şuşanın tarixi taleyi Azərbaycan xalqının üzləşdiyi faciələrin parlaq təzahürlərindən biridir. 1992-ci il mayın 8-də şəhərin Ermənistan silahlı qüvvələri tərəfindən işğal edilməsi xalqımızın yaddaşında ağır iz buraxdı. Şəhərlə yanaşı, ətraf yaşayış məntəqələri də işğalın ağır nəticələri ilə üzləşdi. Azərbaycanın mədəniyyət tarixində xüsusi yeri olan Şuşanın itirilməsi təkcə ərazi itkisi deyildi; bu, milli-mənəvi irsimizə, tarixi yaddaşımıza və xalqımızın öz doğma torpaqları ilə bağlılığının ifadəsinə vurulan ciddi zərbə idi. Lakin Azərbaycan xalqının Şuşaya qayıdacağına olan inamı heç vaxt sarsılmadı”.

Ens.az Qafqazinfo.az-a istinadən xəbər verir ki,bu fikirlər millət vəkili Göydəniz Qəhrəmanovun mətbuata açıqlamasında yer alıb.

O bildirib ki, 2020-ci il noyabrın 8-də Müzəffər Ali Baş Komandan İlham Əliyevin əmrinə əsasən Azərbaycan Ordusu şəhəri işğaldan azad etməklə tarixi ədalətin bərpasına nail oldu: “Şuşa uğrunda döyüşlər hərb tariximizin ən mürəkkəb və qəhrəmanlıqla zəngin səhifələrindən biri kimi yadda qaldı. Xüsusi təyinatlı qüvvələrimizin sıldırım qayaları aşaraq, çətin relyef şəraitində irəliləməsi, məhdud silah və sursat imkanlarına baxmayaraq düşmənin müdafiəsini yarıb şəhərə daxil olması yüksək döyüş hazırlığının və misilsiz igidliyin göstəricisi idi. Cənab Prezident həmin gün Şəhidlər xiyabanından xalqa müraciət edərək Şuşanın azad edildiyini bəyan etməsi Azərbaycanın müasir tarixinin ən qürurlu anlarından birinə çevrildi. Bu qələbənin əhəmiyyəti nəzərə alınaraq 8 Noyabr Zəfər Günü elan edildi, sonradan isə həmin tarix Şuşa Şəhəri Günü kimi də təsis olundu. 2021-ci il yanvarın 14-də dövlət başçısının Şuşada Azərbaycan bayrağını ucaltması şəhərin əbədi olaraq öz dövlətinə qovuşmasının rəmzi oldu”.

Deputatın sözlərinə görə, Şuşanın tarixi simasının bərpası Azərbaycanın öz milli-mədəni irsinə sahib çıxmaq əzminin mühüm göstəricisidir: “Şuşa tarixən Azərbaycanın ictimai-siyasi və mədəni həyatında mühüm rol oynayıb. Bu şəhər musiqi və poeziya ənənələri, memarlıq nümunələri, görkəmli sənətkarları və zəngin tarixi ilə milli mədəniyyətimizin inkişafına böyük töhfələr verib. İşğal dövründə şəhərin tarixi abidələrinin dağıdılması, talan edilməsi və memarlıq irsinə ziyan vurulması onun özünəməxsus simasını dəyişdirmək məqsədi daşıyırdı. Şuşanın azad edilməsindən sonra başlanan bərpa işləri isə bu dağıntıların aradan qaldırılmasına, tarixi yaddaşın qorunmasına və şəhərin əvvəlki mədəni mövqeyinin bərpasına yönəlib. Prezident İlham Əliyevin 2021-ci il 7 may tarixli Sərəncamı ilə Şuşanın Azərbaycanın mədəniyyət paytaxtı elan edilməsi şəhərin inkişafında yeni mərhələnin əsasını qoydu.

Şuşa Şəhəri Dövlət Qoruğunun yaradılması da tarixi-mədəni irsin vahid yanaşma əsasında mühafizəsinə xidmət edir. Bu tədbirlər şəhərin yalnız fiziki görünüşünün yenilənməsini deyil, eyni zamanda onun əsrlər ərzində formalaşmış milli-mədəni kimliyinin qorunmasını da nəzərdə tutur”.

Millət vəkili qeyd edib ki, Şuşanın bərpasında mühüm istiqamətlərdən biri tarixi abidələrin və milli mədəniyyətlə bağlı rəmzlərin əvvəlki görkəminə qaytarılmasıdır: “Xurşidbanu Natəvanın, Üzeyir Hacıbəylinin və Bülbülün güllələnmiş büstlərinin yenidən əvvəlki yerlərində ucaldılması bunun mənəvi baxımdan əhəmiyyətli nümunələrindəndir. Eyni zamanda, şəhərin yol, yaşayış, turizm və sosial infrastrukturunun yenilənməsi Şuşanın daimi həyat üçün əlverişli məkana çevrilməsinə imkan yaradır. Bu işlərin tarixi mühitin qorunması ilə uzlaşdırılması xüsusi əhəmiyyət daşıyır. Çünki Şuşanın dəyəri yalnız onun coğrafi mövqeyi ilə deyil, əsrlər boyu yaratdığı mədəni irs və Azərbaycan xalqının yaddaşında tutduğu yerlə ölçülür. Şuşanın beynəlxalq tədbirlərə ev sahibliyi etməsi də şəhərin yenidən dirçəlməsinin mühüm göstəricisidir. “Xarıbülbül” musiqi festivalı və digər mədəni tədbirlər milli ənənələrimizin təbliği ilə yanaşı, Şuşanın beynəlxalq mədəni dialoq məkanına çevrilməsinə töhfə verir. Şəhərin 2023-cü ildə Türk dünyasının, 2024-cü ildə isə İslam dünyasının mədəniyyət paytaxtı kimi tanınması onun regional və beynəlxalq miqyasda artan nüfuzunu təsdiqləyir. Bu gün Şuşada görülən işlər azad edilmiş torpaqlarda həyatın bərpasının, milli irsə qayğı göstərilməsinin və gələcək nəsillərə zəngin tarixi miras ötürülməsinin ardıcıl siyasətə çevrildiyini göstərir. Şuşa öz azadlığı və dirçəlişi ilə Azərbaycan xalqının tarixi yaddaşını yaşadır, dövlətimizin mədəni irsimizi qorumaq əzmini nümayiş etdirir”.