Tahir Budaqov: 'Azərbaycanda alternativ statistikanın yaranması üçün iş gedir'

"Təklif olunur ki, statistik məlumatların hazırlanmasında sosial şəbəkələrin məlumatlarından istifadə edilsin". 

"Report" xəbər verir ki, bunu jurnalistlərə Dövlət Statistika Komitəsinin sədri Tahir Budaqov deyib.

T.Budaqovun sözlərinə görə, alternativ statistikanın yaranması üçün iş gedir: "Burada həmçinin alternativ mənbələr, mobil operatorların məlumatlarından, kosmik peyklərin çəkilişlərindən və s. istifadəsi də təklif edilir. Bu yeni yanaşmadır, amma heç bir ölkənin statistika qurumu hələlik bundan istifadə etməyib. Amma ilkin araşdırmalar aparılıb. Bildiyiniz kimi bizim artıq 3 peykimiz var. Prezident İlham Əliyev "2018–2025-ci illərdə Azərbaycan Respublikasında rəsmi statistikanın inkişafına dair" Dövlət Proqramını təsdiq etdi. Onun da müddəalarından biri bizim peyklərin imkanlarından istifadə etməklə statistik məlumatların hazırlanması ilə bağlıdır. Xüsusən də kənd təsərrüfatı və daşınmaz əmlak sahələrində bizim peyklərimizin imkanlarından istifadə mümkündür".

T.Budaqov deyib ki, daha çox statistik məlumat üçün daha çox vəsait və kadr cəlb olunmalıdır.