Tokayevi “erməni sevgisi”nə görə peşman etdilər: - Qazaxıstan ziyalılarından sərt reaksiya

Qazaxıstanın yeni seçilmiş prezidenti Kasım-Jomart Tokayevin ermənilərə yönəlik isti fikirləri ölkə ziyalıları arasında kəskin narazılıq doğurub.

Gülnara Jaqıpar, vətəndaş fəalı: “Seçki prosesini və nəticələri çox mənfi dəyərləndirirəm. Nəticələr saxtalaşdırılıb. Ölkədə nə seçmək azadlığı, nə də demokratiya var. Tokayevin Ermənistan və ermənilər barədə dediklərinə gəldikdə isə onu deyə bilərəm ki, mən Ermənistana nifrət edirəm! Azərbaycan mənim üçün qardaş xalqdır və həmişə də qardaşlarımın tərəfində olacam”.

Aygul Altay, tanınmış bloqer:

“Belə bir məlumatımız var ki, bir çox seçki məntəqələrində Kosanov Tokayevdən daha çox səs toplayıb. Ona görə də Tokayevin 70 faiz səslə qalib gəldiyini iddia etməsi xalqın etirzasına səbəb olub. Ermənistan barədə isə onu deyə bilərəm ki, qazax xalqı təəccüb içindədir. Axı qazax dili ilə erməni dili arasındakı yaxınlıqdan söhbət belə gedə bilməz. O da məlumdur ki, Tokayev Nazarbayevin varisi olaraq, Rusiyameyilli siyasətin davamçısıdır”.

Dinara Seysen, vətəndaş fəalı, məşhur bloqer:

“Tokayev Ermənistanla bağlı söylədiyi ifadələrlə azərbaycanlıların hislərinə toxunub. Belə çıxır ki, Ermənistan Qazaxıstan üçün daha vacib tərəfdaşdır? Çünki Qazaxıstanın Azərbaycanla ticarət dövriyyəsi Ermənistanla müqayisədə daha genişdir. Tokayev diplomat kimi danışmağa üstünlük versə də, özünü əsl dövlət başçısı kimi aparmır. Görünür, yeni vəzifəsinə hələ adaptasiya olmayıb və buna görə də danışarkən dövlət başçısının nəzərə almalı olduğu məqamları diqqətdən qaçırıb. Təbii ki, Azərbaycan Qazaxıstan üçün siyasi-iqtisadi cəhətdən daha vacib tərəfdaşdır. Qazax xalqı isə öz növbəsində azərbaycanlılara qohum xalq kimi yanaşır. Ölkəmizdəki Azərbaycan diasporası isə ən böyük və dost diasporalardan biridir. Əlbəttə, Moskva tərəfindən təzyiqlər var, Rusiya türk xalqlarının birləşməsinə və tarixi “İpək yolu”nun bərpasına qarşı çıxır. Qazaxıstanın Azərbaycan və Türkiyə ilə münasibətləri dəyişməyəcək. Burada söhbət Tokayevin yox, xalqın istəyindən gedir. Qazaxıstana güclü və eyni zamanda “böyüklük” etməyə çalışmayan dostlar lazımdır. Belə dostlar isə Azərbaycan və Türkiyədir. Deyirlər, qardaş ölkələr yoxdur və hər dövlətin öz marağı var. Lakin beynəlxalq arenada vacib qərarların qəbulu zamanı Qazaxıstan lazımi dəstəyi məhz türk dövlətlərindən alır. Bu dəstək qarşılıqlı şəkildə reallaşdığı zaman xalqlarımız arasında qan bağlılığının təsiri daha artıq dərəcədə dərk olunur”.

Aygul Utepova, məşhur hüquq müdafiəçisi:

“İndiyə qədər heç bir ticarət mərkəzində erməni konyakı istisna olmaqla, Ermənistan istehsalı olan başqa məhsul görməmişəm. Lakin heç onların konyakı da burada çox məşhur deyil. Çünki Qazaxıstanın özünün əla şərabları var. Unutmayaq ki, Qazaxıstanda Azərbaycanın böyük diasporası var. Azərbaycanlılarla bizi ortaq tarixi keçmişimiz birləşdirir. Ermənistandan fərqli olaraq, bizim ortaq tariximizlə bağlı utanacağımız heç bir məqam yoxdur. Daşnakların Mərkəzi Asiyada həyata keçirdikləri soyqırımına görə ermənilərlə öz hesabımız var. O soyqırım Qazaxıstan SSR-in rəhbəri olmuş Levon Mirzoyanın dövründə törədilib. Qeyd edim ki, Qazaxıstanda heç kim Tokayevin siyasi perspektivinə inanmır. Çox güman ki, o, bir ildən artıq işləyə bilməyəcək. Əgər Tokayev daha uzun müddət vəzifədə qalsa, onun türk xalqları ilə əlaqələri genişləndirəcəyi gözlənilmir. Tokayev Çinmeyilli siyasətçidir, deyilənə görə, qazax dilini bilməsə də, çin dilində danışmağı bacarır. Məlumdur ki, Türkiyə Çinin “düşmən ölkələr” siyahısında yer alır.