Tramp KXDR-ə qarşı genişmiqyaslı hərbi təlimləri bəyənmir

ABŞ Prezidenti Donald Tramp Şimali Koreya lideri Kim Çen Inla dostluq münasibətləri qurduğu üçün KXDR-ə qarşı genişmiqyaslı hərbi təlimləri bəyənmədiyini bildirib.

Ens.az Report.az-a istinadən xəbər verir ki,  Tramp bu barədə Ağ Evdə jurnalistlərin suallarını cavablandırarkən deyib.

"Bizim bu cür genişmiqyaslı, əsasən Şimali Koreyaya qarşı hərbi təlimlər keçirməyimiz xoşuma gəlmədi. Bilirsiniz, mənim onunla (KXDR lideri - red.) dostluq münasibətlərimin olduğunu nəzərə alsaq, bunlar əslində Şimali Koreyaya qarşı təlimlərdir", - Tramp deyib.

Tramp həmçinin Cənubi Koreyanın Hörmüz boğazı ilə bağlı ABŞ-yə yardım göstərməmək qərarını bəyənmədiyini bildirib.

Amerika liderinin sözlərinə görə, genişmiqyaslı hərbi təlimlərin keçirilməsi, ən azı Trampın ABŞ Prezidenti olduğu müddətdə "özünü çox yaxşı aparan" Kim Çen In üçün "çox təhqiramizdir".

Xatırladaq ki, Tramp əvvəllər Pentaqon rəhbəri Pit Heqsetə Cənubi Koreya ilə birgə hərbi təlimlərin müddətinin Şimali Koreyaya "düşmən siqnalı" göndərdiyi üçün azaldılmasını tapşırdığını bildirib.