Tramp Netanyahunu əmin etdi: İsrailin İrana zərbələrinə tam dəstək verəcək

ABŞ Prezidenti Donald Tramp ötən ilin dekabrında Mar-a-Laqoda keçirilən görüş zamanı Benyamin Netanyahunu mühüm qərarla bağlı məlumatlandırıb.

Ens.az Oxu.az-a istinadən xəbər verir ki, bu barədə "Azad İran" "Telegram" kanalı "CBS News" nəşrinin mənbələrə istinadən yaydığı məlumatı paylaşıb.

Məlumata görə, Tramp bildirib ki, əgər Vaşinqton və Tehran arasında rəsmi razılaşma əldə olunmasa, o, İsrailin İranın ballistik raket proqramına endirəcəyi zərbələri birmənalı şəkildə dəstəkləyəcək.

Qeyd olunur ki, həmin görüşdən iki ay sonra ABŞ-nin Pentaqon rəhbərliyi və kəşfiyyat icması daxilində vəziyyət daha da gərginləşib. Belə ki, qurumlar arasında İsrailin İrana qarşı həyata keçirə biləcəyi mümkün zərbələrin dəstəklənməsi ilə bağlı intensiv daxili müzakirələr başlayıb.

Mənbələrin sözlərinə görə, hazırda əsas diqqət İsrailin zərbə endirmək qabiliyyətinə deyil, ABŞ tərəfindən göstərilə biləcək mümkün dəstəyin formatına yönəlib. Nəzərdən keçirilən konkret tədbirlər arasında İsrail hərbi təyyarələrinin havada yanacaqla təmin edilməsi, eləcə də uçuşların həyata keçirilməsi üçün üçüncü ölkələrin hava məkanından istifadə icazələrinin əldə olunması məsələsi yer alır.