Trampın Kim Çen Inla növbəti görüş planı məlum olub

ABŞ Prezidenti Donald Tramp öz köməkçilərindən payızda Şimali Koreya (KXDR) lideri Kim Çen Inla görüş təşkil etmələrini tələb edib.

Ens.az Oxu.az-a istinadən xəbər verir ki,  bu barədə mənbələrə istinadən "The Wall Street Journal" (WSJ) nəşri məlumat yayıb.

Məlumata əsasən, Tramp Asiyaya növbəti səfəri zamanı Kim Çen Inla təkbətək danışıqlar aparmaq imkanını məsləhətçiləri ilə müzakirə edib.

Nəşr qeyd edir ki, Tramp noyabr ayında Çinin Şençjen şəhərində keçiriləcək Asiya-Sakit Okean İqtisadi Əməkdaşlığı (APEC) sammitində iştirak etmək üçün həmin bölgəyə səfər edə bilər. Hazırda isə ABŞ və KXDR liderlərinin görüşü ilə bağlı rəsmi planlaşdırma aparılmır.

Bildirilir ki, Tramp Kim Çen Inla bu görüşü dialoqu yenidən başlamaq və Şimali Koreyanı nüvə proqramından imtina etməyə inandırmaq üçün bir fürsət kimi qiymətləndirir.

Avqustun 17-də ABŞ lideri Kim Çen Inın danışıqlar aparmaq təşəbbüsünə cavab verdiyini və onların arasında qarşılıqlı anlaşmanın yarandığına inandığını bəyan edib.

Xatırladaq ki, Tramp birinci prezidentlik dövründə KXDR lideri ilə üç dəfə - 2018-ci ilin yayında, həmçinin 2019-cu ilin qış və yay aylarında görüşüb.