Trampın partiya yoldaşları narahatdırlar: Qərarını dəyişməsi üçün administrasiyaya təzyiq edirlər

Respublikaçı qanunvericilər ABŞ Prezidenti Donald Tramp Administrasiyasına təzyiq edirlər və bu yaxınlarda tətbiq edilən ticarət rüsumlarının ləğv edilməsini və ya ən azından, sonrakı addımların daha ətraflı strategiyasının təqdim edilməsini tələb edirlər.

Ens.az Oxu.az-a istinadən xəbər verir ki, bu barədə "The Washington Post" nəşri yazıb.

Bir çox respublikaçılar Trampı açıq şəkildə tənqid etməkdə tərəddüd edirlər və onunla "eyni cərgədə" qalmağa üstünlük verirlər. Lakin onlar ciddi şəkildə narahatdırlar ki, hazırkı prezidentin qərarları səbəbindən ABŞ iqtisadiyyatı zəifləyərsə, nəticə etibarilə partiyaları yüksək siyasi bədəl ödəmək məcburiyyətində qalacaq.

Xatırladaq ki, aprelin 2-də Donald Tramp 185 ölkə üçün idxal rüsumlarının yeni sistemini tətbiq edib. Baza dərəcəsi bütün idxal olunan mallar üzrə 10% təşkil edib, lakin bəzi ölkələr üçün bu, daha yüksək olub. Belə ki, Çin üçün rüsum 34%-ə, Vyetnam üçün 46%-ə, Avropa İttifaqı ölkələri üçün isə 20%-ə çatıb. Bu addıma cavab olaraq Çin də ABŞ mallarına 34 faiz rüsum tətbiq edib.

Trampın qərarı bir çox dünya ölkələrinin liderləri tərəfindən kəskin tənqidə məruz qalıb və onlar cavab tədbirləri ilə hədələyiblər. Bu hadisələr fonunda ABŞ fond bazarı koronavirus pandemiyasının başlanğıcındakı səviyyəyə qədər çöküb. Rüsumlar Avropa müdafiə şirkətlərinin səhmlərinə də təsir edib. "Bloomberg"in bildirdiyinə görə, dünyanın ən varlı insanları ABŞ-nin yeni tariflərinin tətbiqindən sonra ümumilikdə 208 milyard dollar itiriblər.