Ukrayna Rusiyanın neft emalı zavodlarına hücumları hansı halda dayandıracaq? - Zelenski şərtini açıqladı

"Ukrayna Rusiyanın neft emalı zavodlarına hücumları dayandırmağa hazırdır, amma şərtlər var".

Oxu.Az-ın xəbərinə görə, bu barədə Ukrayna Prezidenti Volodimir Zelenski "Fox News" telekanalına müsahibəsində danışıb.

Zelenski bildirib ki, ABŞ Prezidenti Donald Tramp və onun köməkçiləri ilə bu məsələyə dair "bir neçə fərqli" müzakirə aparıb. Vaşinqton Kiyevdən bu cür hücumları dayandırmasını istəyir.

"Biz dedik ki, Rusiya bizim enerji infrastrukturumuza hücum etdiyi, insanlarımızı öldürdüyü, elektrik enerjisi obyektlərinə, qaz sənayesinə, neft emalı zavodlarına - hər şeyə zərbə vurduğu bir vaxtda cavab verməyə bilmərik", - deyə o qeyd edib.

Zelenskinin sözlərinə görə, Rusiya Ukraynanın enerji sisteminə zərbələri dayandırarsa, Ukrayna hücumları dayandırmağa hazırdır.

"Başqa variant da var: bizə "Patriot" raketləri verin, biz vasitələr tapacağıq - bu, sadəcə kömək üçün xahiş deyil... Biz onlar üçün pul ödəməyə hazırıq", - deyə Zelenski bildirib.

O vurğulayıb ki, Ukrayna hücumları yalnız raketlərlə təmin edildiyi müddətcə dayandıracaq.

"Əgər Rusiyanın neft emalı zavodlarına hücumu bir aylıq dayandırmağımızı istəyirsinizsə, bizə bir ay müddətinə "Patriot" verin", - deyə Volodimir Zelenski şərtini irəli sürüb.