Uşaq bağçalarına elektron növbələrin yaradılmasına başlanılır

Azərbaycanda məktəbəqədər təhsil müəssisələrinə qəbul üçün elektron növbələrin yaradılmasına başlanılır.

Bu barədə Məktəbəqədər və Ümumi Təhsil üzrə Dövlət Agentliyi məlumat yayıb.

Bildirilib ki, regional təhsil idarələrinin tabeliyində olan və Naxçıvan Muxtar Respublikasında yerləşən məktəbəqədər təhsil müəssisələrinə qəbul üçün elektron növbələrin yaradılması 7 iyul saat 11:00-da başlayacaq.

Bakıdakı uşaq bağçalarına qəbul üçün elektron növbələrin yaradılmasına isə 9 iyul saat 11:00-da start veriləcək.

Məlumata görə, 2021 və 2022-ci il təvəllüdlü uşaqlar üçün növbələr saat 11:00-da, 2023, 2024 və 2025-ci il təvəllüdlü uşaqlar üçün isə saat 15:00-da aktivləşdiriləcək.

Bu ildən etibarən qəbul ilk dəfə myGov platforması üzərindən həyata keçiriləcək. Valideynlər və ya qanuni nümayəndələr platformada şəxsi kabinetə daxil olaraq “Xidmətlər” bölməsindən Elm və Təhsil Nazirliyinin “Məktəbəqədər təhsil müəssisələrinə qəbul” xidmətini seçə və elektron müraciət göndərə biləcəklər.

Qeyd olunub ki, bir uşaq üçün maksimum 3 uşaq bağçası seçmək mümkündür.

Boş yer olduğu halda yaradılmış elektron növbə ən tezi 5 gündən sonra avtomatik olaraq müraciətə çevriləcək. Bundan sonra valideynlər 7 gün ərzində tələb olunan sənədləri seçilən məktəbəqədər təhsil müəssisəsinə təqdim etməlidirlər.

Sənədlər vaxtında təqdim edilmədikdə müraciət ləğv olunacaq və həmin yer növbədə olan növbəti uşağa veriləcək.

Ötən tədris ilində yaradılmış növbə və müraciətlərin isə arxivləşdirilərək valideynlərin şəxsi kabinetlərində saxlanıldığı bildirilib.