Vens ABŞ-nin Qrenlandiyada hədəfləri barədə - “İnkar etmirik”

ABŞ-nin vitse-prezidenti Ceyms Devid Vens Qrenlandiyadakı hərbi bazaya gedib.

“Qafqazinfo” “Sky News”a istinadən xəbər verir ki, o, mətbuata açıqlamalar verib.

Vens bildirib ki, ABŞ Arktikada liderliyi təmin etməlidir. Onun ssözlərinə görə, Vaşinqton Moskva və Pekinin, eləcə də digər ölkələrin Arktika marşrutlarında, dəniz yollarında və bu ərazilərin mineral ehtiyatlarında maraqlarından xəbərdardır.

“Biz əmin olmalıyıq ki, Amerika Arktikada liderdir. Çünki bilirik ki, Amerika bunu etməsə, boşluğu digər ölkələr dolduracaq ”, - Vens bildirib.

O həmçinin əlavə edib ki, Vaşinqtonun Qrenlandiyada hərbi mövcudluğunu genişləndirmək planları yoxdur, lakin məqsəd adada yerləşən buzqıran və hərbi gəmilərə investisiya qoymaqdır.

“Qrenlandiya ABŞ-nin himayəsi altında daha yaxşı olacaq, Vaşinqton ada sakinlərinin öz müqəddəratını təyinetmə hüququnu inkar etmir və tərəfdaşlıq təklif edir”, -  ABŞ vitse-prezidenti vurğulayıb.

O qeyd edib ki, ABŞ adaya daha çox Hərbi Dəniz Qüvvələri gəmiləri göndərmək istəyir.

“Danimarka bu bazanı saxlamaq, qoşunlarımızı dəstəkləmək və mənim fikrimcə, Qrenlandiya əhalisinin təhlükəsizliyini təmin etmək üçün lazım olan resursları təmin etmir”, - deyə Vens əlavə edib.

Bundan başqa o, ABŞ-nin Qrenlandiyanın öz müqəddəratını təyinetmə yolu ilə müstəqillik qazanacağını və daha sonra ABŞ-yə qoşulmaq üçün danışıqlara başlayacağını gözlədiyini söyləyib.