Vətəndaşların iki milyon manata yaxın pulunu mənimsəyən şəxs məhkəmə zalında qandallandı

Bakıda vətəndaşların iki milyon manata yaxın pulunu dələduzluqla mənimsəməkdə təqsirləndirilən Sirac Səmədov və onun yaxın qohumu Sahil Nəhmətovun cinayət işi üzrə məhkəmənin növbəti iclası keçirilib.

Ens.Az-ın məlumatına görə Bakı Ağır Cinayətlər Məhkəməsinin hakimi Elnur Nuriyevin sədrliyi ilə baş tutan prosesdə zərərçəkənlərin vəkilləri müttəhim Sahil Nəhmətovun zərərçəkənlərə vurulan ziyanı ödəmədiyini əsas gətirərək, onun barəsindəki həbs olmayan qətimkan tədbirinin dəyişdirilməsini istəyiblər.

Məhkəmə vəsatəti təmin edib, S.Nəhmətova dair əvvəlki qərar həbs qətimkan tədbiri ilə əvəzlənib. O, məhkəmə zalında qandallanaraq həbs olunub.

Növbəti iclas yanvarın 30-na təyin edilib.

Xatırladaq ki, 2024-cü ilin dekabr ayında Sirac Azad oğlu Səmədov və Sahil Nizami oğlu Nəhmətov özgənin əmlakını qanunsuz ələ keçirmək məqsədilə qabaqcadan əlbir olan bir qrup şəxs halında M.N-nin etibarından sui-istifadə edərək etibarnamə almağa nail olublar.

Bundan sonra araq M.N-nin "BMW330İ" markalı avtomobilini sataraq pul vəsaitini ələ keçirməklə 60 min manatını mənimsəyiblər.

Onlar digər zərərçəkənlərin - Ü.M-nin 350 min, H.M-nın 140 min, N.M-nın 136 min, Q.V-nin 330 min, Ş.T-nın 200 min, B.B-nin 600 min manat pulunu ələ keçiriblər.

Bu və digər epizodlarla onlar vətəndaşların 2 milyon manata yaxın pulunu ələ keçiriblər.

Faktla bağlı cinayət işi başlanıb, hər iki şəxs məsuliyyətə cəlb olunub. Onlar barəsində CM-nin 178.4-cü (dələduzluq külli miqdarda törədildikdə ) maddəsi ilə cinayət işi açılaraq, ittiham irəli sürülüb.