Xocalılı məcburi köçkün: Bircə arzum var, o da doğma yurdumuza qayıtmaqdır

Xocalıdan olan məcburi köçkün Əlövsət İsgəndərov 1992-ci ildən Ağdaş rayonunda məskunlaşıb. Ağdaşın qərbində, Məşəd ərazisində ailə fermer təsərrüfatı yaradan məcburi köçkün hazırda əkinçilik, heyvandarlıq və arıçılıqla məşğul olur. Təsərrüfata bağlılıq və zəhmətsevərlik ailəyə uğurlarını ildən-ilə artırmağa imkan verib.

AZƏRTAC-ın bölgə müxbiri ilə söhbətində ermənilərin törətdikləri qırğından, köçkün həyatının ilk illərinin çətinliklərindən danışan Əlövsət kişi deyib: “Artıq 79 yaşım var. O dəhşətli günlərin acı xatirəsi hələ də gecələr yuxumdan çıxmır. Qurduğumuz bu təsərrüfat 20 nəfərlik ailəmin nəinki təminatı, həm də məşğuliyyətidir”.

Təsərrüfatın ayrı-ayrı sahələrindən həvəslə danışan Ə.İsgəndərov gələn il üçün 60 hektar ərazidə payızlıq taxıl əkdiklərini, mal-qara üçün 20 hektar ərazidə yonca səpdiklərini bildirib. Hazırda ailə, həmçinin 100 baş iribuynuzlu heyvan bəsləyir. Ətlik və südlük heyvanlar üçün ayrıca tövlələr tikilib. Son illər inəklərin cins tərkibinin yaxşılaşdırılması məqsədilə süni mayalandırmaya böyük üstünlük verilir və yaxşı nəticə alınır. Fermer təsərrüfatında, habelə 30 qutu arı ailəsi də bəslənilir.

Təsərrüfat genişləndikcə əlavə işçilərə ehtiyac yaranır. Artıq fermaya 10 nəfər işçi cəlb olunub və onlara hər ay orta hesabla 300 manat əməkhaqqı ödənilir.

Qazandıqları uğurlarda dövlətin dəstəyinin də böyük köməyinin olduğunu söyləyən Əlövsət İsgəndərov hazırda təkcə bir arzu ilə yaşadığını bildirərək deyib: “Bütün bu illər ərzində dövlətimizin qayğısı daim üstümüzdə olub. Buna görə Prezidentimizə çox minnətdarıq. İndi bircə arzum var, o da doğma yurdumuza qayıtmaqdır”.