Yaponiya və ABŞ irimiqyaslı hərbi təlimlərə başlayıblar

Yaponiyanın Quru Özünümüdafiə Qüvvələri və ABŞ Dəniz Piyadaları Korpusu şənbə günü Kyuşu adasında və Okinava prefekturasının adalarında iyunun 30-dək davam edəcək "Resolute Dragon 2026" ("Qətiyyətli əjdaha") səhra təlimlərinə başlayıb.

Ens.az Oxu.az-a istinadən xəbər verir ki, bu barədə "Maynichi Shimbun" qəzeti məlumat dərc edib.

Məlumata görə, təxminən 9.5 min amerikalı və yapon hərbçisinin qatıldığı bu təlimlərin başlıca hədəfi adaların ehtimal olunan düşmən işğalından qorunması taktikalarını təkmilləşdirməkdir. Prosesə quru qoşunları, hərbi aviasiya, zirehli texnikalar və desant gəmiləri cəlb edilib. Bildirilib ki, eyni zamanda, manevrlər zamanı Yaponiyaya məxsus sahil müdafiə təyinatlı gəmi əleyhinə raket sistemlərindən də istifadə olunacaq.

Qeyd edək ki, Kumamoto prefekturasının Kenqun düşərgəsində keçirilən açılış mərasimində çıxış edən Yaponiya Özünümüdafiə Qüvvələrinin Qərb Ordusunun komandanı, general-leytenant Seydzi Toriumi qeyd edib ki, müdafiə potensialının bu cür nümayiş etdirilməsi "Hind-Sakit okean hövzəsində sülhün və sabitliyin təminatı baxımından çox vacibdir".