Azad edilmiş ərazilərdə milyardlıq layihələrdə maliyyə yoxlaması aparılır

2026-cı ilin yanvar-sentyabr aylarında işğaldan azad edilmiş ərazilərdə həyata keçirilən 91 dövlət investisiya və infrastruktur layihəsi maliyyə ekspertizasına cəlb olunub.

Oxu.Az Maliyyə Nazirliyinə istinadən xəbər verir ki, hesabat dövründə 59 layihə üzrə maliyyə ekspertizası tamamlanıb, 32 layihə üzrə isə davam edir. Ekspertizası tamamlanmış layihələrin ümumi dəyəri bir milyard 38 milyon manat təşkil edib.

Ekspertiza dövlət vəsaitlərindən qənaətlə istifadə olunması, layihələrin optimallaşdırılması və qabaqlayıcı nəzarətin gücləndirilməsi məqsədilə aparılır.

Bu çərçivədə mal, material və avadanlıqların, eləcə də işçi qüvvəsindən, maşın və mexanizmlərdən istifadə ilə bağlı xərclərin qüvvədə olan normalara və orta bazar qiymətlərinə uyğunluğu yoxlanılır.

Həmçinin layihə cizgiləri ilə smeta sənədləri arasında miqdar və hesablama uyğunsuzluqlarının müəyyənləşdirilməsi üçün iş həcmləri ekspertizadan keçirilir.