Azərbaycan ikitərəfli daşımaların daha da asanlaşdırılmasını təklif edir

Azərbaycan ikitərəfli daşımaların daha da asanlaşdırılmasını təklif edir

“Sərhəd-keçid məntəqələrində tranzit keçid halları istisna olmaqla ikitərəfli daşımalarda icazə vərəqinin verilməsinin dayandırılması təklif edilir”.

“Report” xəbər verir ki, bunu “Real TV”yə müsahibəsində Nəqliyyat, Rabitə və Yüksək Texnologiyalar Nazirliyi yanında Dövlət Avtomobil Nəqliyyat Xidmətinin rəis müavini İbrahim Əliyev bildirib.

İ.Əliyevin sözlərinə görə, ölkələrlə il ərzində 124 min icazə vərəqi mübadilə edilir: “Mübadilə etdiyimiz vərəqlərin 90%-ni istifadə edirik. 25 ölkə ilə avtomobil nəqliyyatı ilə bağlı sazişlər imzalamışıq. Bu sazişlər çərçivəsində biz mübadiləni həyata keçiririk. Mübadilə edilmiş icazə vərəqlərindən əlavə sərhəddə də icazə vərəqi alırlar. Biz sərhəddə verilən icazə vərəqinin ləğvini istəyirik. Biz qanunvericilik aktları hazırlamışıq. Hazırda İqtisadiyyat Nazirliyi ilə aktiv müzakirələr aparılır. Bunun üzərində iş aparılır”.