Donald Tramp və İlon Maskı barışdıran SƏBƏB

ABŞ Prezidenti Donald Tramp və iş adamı İlon Mask uzunmüddətli fikir ayrılığından sonra münasibətlərini normallaşdırıblar. Buna əsas səbəb kimi milyarderin noyabr ayında baş tutacaq seçkidə Respublikaçılar Partiyasına dəstək vermək niyyəti göstərilir.

Ens.az Oxu.az-a istinadən xəbər verir ki, bu barədə məlumatı öz mənbələrinə əsaslanaraq "The Wall Street Journal" (WSJ) nəşri paylaşıb.

"Mask qeyd edib ki, Respublikaçılar Partiyasının Konqresdəki üstünlüyünü qoruyub-saxlamağa kömək məqsədilə seçici fəallığının artırılması əməliyyatına ən azı 100 milyon dollar vəsait ayırmağı planlaşdırır. Bu addım Tramp və Maskın yenidən bir araya gəlməsi istiqamətindəki təqribən birillik səylərin zirvə nöqtəsi olub", - deyə məqalədə vurğulanır.

Bundan başqa, onların yenidən dialoqa başlamasına mühafizəkar fəal Çarli Kirkə qarşı həyata keçirilən sui-qəsd də təsir göstərib. Prezidentin adları açıqlanmayan köməkçilərinin məlumatına görə, Tramp şəxsi danışıqlarında Maskla bir daha heç vaxt keçmişdəki qədər yaxın münasibətdə olmayacaqlarını bildirir. Bununla belə, onlar hazırda ayda təxminən bir dəfə ünsiyyət qurur, süni intellekt, Çin və qlobal aləmdə baş verən hadisələr ətrafında fikir mübadiləsi aparırlar.