Fransa Birinci xanımının illik xərcləri 280 min avro təşkil edir

Fransada ölkənin hazırkı birinci xanımı Brijit Makronun illik xərcləri 280 min avro təşkil edir.

"Report"un Fransa bürosu xəbər verir ki, bu barədə Fransanın Hesablama Məhkəməsinin bu gün dərc olunan hesabatında qeyd olunub.

Sənədə əsasən, 2018-ci ildə Fransanın hazırkı birinci xanımı Brijit Makronun gündəlik xərclərinə 280 min avro ayrılıb. Lakin bu məbləğ birinci xanımın bütün xərclərini ödəməyib. Belə ki, bura xanımın xarici səfərlər zamanı prezidenti müşayiət etməsinə çəkilən xərclər, eyni zamanda birinci xanımın saç və makiyaj ustasının maaşı daxil edilməyib.

Brijit Makron ötən il prezidenti 15 xarici səfər zamanı müşayiət edib.

2017-ci ildə isə ona ayrılan dövlət vəsaiti 440 min təşkil edib.

Qeyd edək ki, Fransanın sabiq prezidenti Jak Şirakın xanımı Bernadet Şiraka dövlət büdcəsindən ayrılan vəsaitin məbləği ayda 80 min avro olmaqla ildə 960 min avro olub. Karla Bruni-Sarkoziyə isə il ərzində 720 min avro vəsait ödənilib.