Gələn il ən çox hansı vergilər üzrə büdcəyə daxilolmalar artacaq?

Azərbaycanda 2027-ci ildə dövlət büdcəsinə vergi daxilolmalarının əksər növləri üzrə artım proqnozlaşdırılır. Ən böyük artımın fiziki şəxslərin gəlir vergisi və hüquqi şəxslərin mənfəət vergisi üzrə qeydə alınacağı gözlənilir.

Ens.Az xəbər verir ki, bu, "Azərbaycan Respublikasının 2027-ci il dövlət büdcəsi haqqında" qanun layihəsi ilə 2026-cı ilin təsdiqlənmiş büdcəsinin müqayisəsindən məlum olur.

Gələn il fiziki şəxslərin gəlir vergisi üzrə daxilolmaların 3 milyard 70 milyon manat təşkil edəcəyi nəzərdə tutulur. Bu, 2026-cı ilin 2 milyard 379.3 milyon manatlıq göstəricisindən 690.7 milyon manat və ya 29 faiz çoxdur.

Hüquqi şəxslərin mənfəət vergisindən daxilolmaların isə 403 milyon manat və ya 6.1 faiz artaraq 6 milyard 983 milyon manata çatacağı proqnozlaşdırılır. Cari ildə bu istiqamət üzrə 6 milyard 580 milyon manat nəzərdə tutulub.

Əlavə dəyər vergisi (ƏDV) üzrə daxilolmaların 9 milyard 216,3 milyon manatdan 9 milyard 386 milyon manata yüksəlməsi gözlənilir. Bu isə 169.7 milyon manat və ya 1.8 faiz artım deməkdir.

Aksiz vergisi üzrə daxilolmaların 91 milyon manat və ya beş faiz artaraq 1 milyard 909 milyon manat, sadələşdirilmiş vergi üzrə daxilolmaların isə 38 milyon manat və ya 8.9 faiz artaraq 467 milyon manat olması planlaşdırılır.

Bununla yanaşı, əmlak vergisi üzrə daxilolmaların 24 milyon manat, mədən vergisi üzrə dörd milyon manat, torpaq vergisi üzrə isə bir milyon manat artırılması proqnozlaşdırılır.

Vergi daxilolmalarında azalma nəzərdə tutulan istiqamət isə yol vergisidir. Bu vergi üzrə daxilolmaların 2026-cı ildəki 394.4 milyon manatdan 2027-ci ildə 368 milyon manata enəcəyi gözlənilir. Beləliklə, azalma 26.4 milyon manat və ya 6.7 faiz təşkil edəcək.

Qeyd edək ki, 2027-ci ilin dövlət büdcəsinin ümumi gəlirləri 39 milyard 254 milyon manat, xərcləri isə 42 milyard 400 milyon manat səviyyəsində proqnozlaşdırılır.

Abbas Mirzəyev