Azərbaycanın dövlət büdcəsində kəsir artacaq

Azərbaycanda 2027-ci il dövlət büdcəsinin kəsirinin 3 milyard 146 milyon manat təşkil edəcəyi proqnozlaşdırılır.

Ens.az Oxu.az-a istinadən xəbər verir ki,bu göstərici "Azərbaycan Respublikasının 2027-ci il dövlət büdcəsi haqqında" qanun layihəsində nəzərdə tutulan gəlir və xərclər arasındakı fərq əsasında hesablanıb.

2026-cı ilin təsdiqlənmiş büdcəsində gəlirlərlə xərclər arasındakı fərq 3 milyard 94.6 milyon manat təşkil edir.

2027-ci ildə büdcə kəsirinin cari ilin təsdiqlənmiş göstəricisi ilə müqayisədə 51.4 milyon manat və ya təxminən 1.7 faiz artacağı gözlənilir.

Layihəyə əsasən, gələn il dövlət büdcəsinin gəlirləri 39 milyard 254 milyon manat, xərcləri isə 42 milyard 400 milyon manat səviyyəsində proqnozlaşdırılır.

Bununla yanaşı, büdcə kəsirinin ümumi xərclərə nisbətinin hər iki ildə təxminən 7.4 faiz səviyyəsində qalacağı gözlənilir.

Qeyd edək ki, 2027-ci ildə dövlət büdcəsinin mərkəzləşdirilmiş gəlirlərinin 38 milyard 518.4 milyon manat, mərkəzləşdirilmiş xərclərinin isə 41 milyard 664.4 milyon manat olması nəzərdə tutulur.