"Həyatımda bu qədər böyük bir Azərbaycanı faktiki olaraq görməmişdim"

"Vətən torpağının dolayları, yolları, xəritəsi xeyli dərəcədə böyüyüb və biz bu uzun yolları fırlanıb gələrək gecikməklə həm də bu böyüklüyü, şərafəti bir az başqa formada - Laçına ilk dəfə gəlməklə yaşamaq sevincinə nail ola bildik". 

Ens.az Ölkə.az-a istinadən xəbər verir ki,bunu Sosial Tədqiqatlar Mərkəzinin departament rəhbəri Əziz Əlibəyli Laçında keçirilən konfransda çıxışı zamanı deyib.

"Cənab Prezident İlham Əliyevin bütün addımlarının əvvəlində vətənin bütün istiqamətlərinə yol çəkmək siyasəti durur. Yol özü ilə mədəniyyət gətirir, qalibiyyət gətirir, insanları, qalıcı əmək düşərgələrini, vətənin özünü gətirir. 

Mən həyatımda bu qədər böyük bir Azərbaycanı faktiki olaraq görməmişdim. Onu bu gün gördüm ki, yol boyu üzü Füzulidən Arazboyu istiqamətində - hər qarışboyu Azərbaycan insanları işləməkdədir. Və zəfər Azərbaycanından əmək Azərbaycanına keçidi... Sonradan cənab Prezident bunu ekoloji Azərbaycana çevirməklə bağlı çağırışları və hətta müvafiq sərəncamları ilə dəstəklədi. Yeni bir Azərbaycanın quruculuğuna bütün dünyanın şahid olacağı bir nümunəni göstərməyə başladı".