Mirkazim Nikbin - Mən

Kam almayıb bu həyatdan 
Uşaqlıqdan qocaldım mən.
Nə yaşadım, nə də öldüm,
Ortalıqda tək qaldım mən.

Xəyal dolu, fikrim boşdu,
Ruhum sağlam, can naxoşdu,
Doğuşdan ağlım sərxoşdu,
Ayıldıqca ucaldım mən.

Düşüb eşqin sorağına,
Çatdım sədaqət bağına,
Gördüm qar yağmış ağına,
Ağlarında qaraldım mən.

Eh çəkdim cavan görəndə,
Dərdsiz danış güləndə,
Günahsız uşaq öləndə,
Öz gözümdə alçaldım mən.

Hər düzü bildim özümdən,
Səhvləri saldım gözümdən,
Öz odumdan, öz közümdən,
Yandıqca yara aldım mən.