NATO-nun növbəti baş katibi qadın ola bilər

Danimarkanın baş naziri Mette Frederiksen Yens Stoltenberq postunu tərk etdikdən sonra NATO-nun növbəti baş katibi ola bilər.

Redaktor.az xəbər verir ki, "Politico"nun yazdığına görə, Avropa ölkəsinin nümayəndəsi hərbi alyansın baş katibi olması üçün Vaşinqtonun razılığı lazımdır.

Bu kontekstdə nəşr Ağ Evdən verilən mesaja istinad edir ki, Co Bayden iki ölkə arasında əlaqələr, NATO müttəfiqlərinin transatlantik tərəfdaşlığın gücləndirilməsi istiqamətində gördüyü işlər, Ukraynaya dəstək və digər məsələləri müzakirə etmək üçün iyunun 5-də Fredrikseni qəbul edəcək.

“Politico” yazır ki, bu, Fredriksenin Yens Stoltenberqin səlahiyyət müddəti bitdikdən sonra NATO-nun yeni rəhbəri olacağını deməyə əsas verir. Bununla belə, alyans üzvləri yeni liderlə bağlı razılığa gələ bilməsələr, Stoltenberq daha bir neçə ay qala bilər.

Nəşr qeyd edir ki, Fredriksen hərbi alyansın baş katibi vəzifəsinə namizəd üçün bir sıra tələblərə cavab verir. Birincisi, güman edilir ki, alyansın yeni rəhbərinin hökumət başçısı kimi təcrübəsi olacaq, ikincisi, qadının yeni baş katib olması arzuolunandır, çünki indiyədək NATO-nun rəhbərləri hamısı kişi olub.

Eyni zamanda, Danimarka Ukraynanı dəstəkləyən mərkəzi NATO ölkəsi kimi görünür, lakin bəzi Şərqi Avropa dövlətləri qədər radikal deyil.

Bu arada xatırladaq ki, NATO rəhbəri vaxtilə danimarkalı olub. Danimarkanın keçmiş baş naziri Anders Foq Rasmussen 2009-2014-cü illərdə Stoltenberqdən əvvəl alyansa rəhbərlik edib, ona görə də Danimarka nümayəndəsinin təyin edilməsi bəzi ölkələrdə narazılığa səbəb ola bilər.

"Bundan əlavə, Fredriksenin Danimarkanın baş naziri postunu tərk edə biləcəyi məlum deyil",- deyə "Politico" yazıb.