Sülhməramlılar çıxır, Rusiyanı ləkələmək istəyəcəklər

Rusiya sülhməramlılarının vaxtından əvvəl çıxarılması Rusiya və Azərbaycan liderlərinin birgə qərarına əsasən həyata keçirilir.

Ens.az Axar.az-a istinadən xəbər verir ki, bunu rusiyalı politoloq İqor Korotçenko deyib.

“Əliyev və Putin bir-birinə hörmət edən, bərabərhüquqlu ünsiyyət quran liderlərdir və bu qərarı onlar verib. Həm Azərbaycan, həm də Rusiya bir-birinə qarşı strateji maraq mövqeyindədir. Dəfələrlə həm Putin, həm də Əliyev ictimai qiymətləndirmələrində Rusiya sülhməramlılarının Cənubi Qafqazda sabitlik və təhlükəsizliyə verdiyi töhfəni yüksək qiymətləndirib. Ötən ilin sentyabrında Azərbaycan Qarabağda antiterror tədbirləri keçirib və bunun nəticəsində ərazi bütövlüyünü bərpa edib. Separatçı rejim öz mövcudluğunu dayandırdığını elan edib və Qarabağ iqtisadi rayonunun erməni əhalisi könüllü olaraq Ermənistana getməyə qərar verib, yeni reallıq yaranıb. Bu yeni reallıq kontekstində Rusiya sülhməramlılarının missiyası başa çatmış hesab edilir və onların Qarabağdakı xidmətinin başa çatması qərara alınıb. Rusiya hər zaman Azərbaycanın ərazi bütövlüyünü tanıyıb”, - Korotçenko bildirib.

Onun sözlərinə görə, Rusiya sülhməramlılarının Qarabağdan çıxarılmasında "qara pişik" axtarmağa ehtiyac yoxdur:

“Azərbaycan öz təhlükəsizliyini təmin edə bilər. Təbii ki, Rusiya tərəfində bu anlayış var. Qərb və Ermənistan vəziyyətdən istifadə edəcək. İndi Rusiyanı ləkələmək, Moskva ilə Bakını münaqişəyə sövq etmək üçün hər cür cəhdlər olacaq, Rusiyanın Cənubi Qafqazda mövqeyini sarsıtmağa yönəlmiş bəyanatlar veriləcək. Biz çoxdan Qərbin Ermənistanda revanşist əhval-ruhiyyə ilə oynayan qızışdırıcı bəyanatlarına öyrəşmişik. Xatırladığımız kimi, rəsmi İrəvan vaxtaşırı Rusiya sülhməramlılarına qarşı qəbuledilməz bəyanatlar səsləndirirdi. Nədənsə, İkinci Qarabağ müharibəsi zamanı İrəvanda çoxları hesab edirdi ki, Rusiya Azərbaycan ərazisində erməni maraqları üçün mübarizə aparmalıdır. Nəyə görə? Ən yüksək səviyyəli həyasızlıqdır. Yaxşı, indi sülhməramlıların çıxarılması ilə bu vəziyyətdən istifadə edib və təhrif edəcəklər, amma nə olacaq ki! Bu, ilk dəfə deyil. Rusiyanın guya Cənubi Qafqazda mövqelərini itirməsi tezislərini irəli sürmək cəhdlərinə yalnız Azərbaycan kimi regionda bizə dost olan ölkələrlə əməkdaşlığı gücləndirmək və inkişaf etdirməklə cavab vermək lazımdır. Paşinyan açıq-aşkar destruktiv hərəkət edir. Moskva dəfələrlə bütün siqnalları İrəvana göndərib, aydındır ki, növbəti dəfə bizim tərəfimizdən iqtisadi addımlar erası gələ bilər”.