Agentlik sədri: "ASAN xidmət" dövlət-özəl tərəfdaşlığı platformasına çevrilib

"ASAN xidmət" dövlət-özəl tərəfdaşlığı platformasına çevrilib.

Ens.az xəbər verir ki, bunu Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev "Baku TV"yə müsahibəsində deyib.

Onun sözlərinə görə, burada əsas məqsəd vətəndaş məmnunluğunu təmin etməkdir:

"Tutaq ki, vətəndaş bura hansısa bir məsələ üçün gəlir, eyni zamanda bank, sığorta, hüquqi, tərcümə və digər bütün məsələlərlə bağlı xidmətləri ala bilir. Bir sözlə, vətəndaş bir binaya gəlməklə bir neçə problemi eyni anda həll etmək imkanına sahib olur".

Ü.Mehdiyev bildirib ki, növbəti beş il ərzində "ASAN xidmət"də çeşidliliyin artırılması, eyni zamanda, xidmət proseslərinin rəqəmsallaşdırılması ilə bağlı, xüsusilə də süni intellektin yaratdığı imkanlardan faydalanmaq üçün bu istiqamətdə həllərin tətbiqi Agentliyin əsas hədəflərindəndir.

Agentlik sədri həmçinin "Mister ASAN" adlı süni intellekt köməkçisi ilə bağlı da bəzi detalları açıqlayıb:

"Bu süni intellekt köməkçisi mənə hər həftə "ASAN xidmət"də baş verən proseslər, yəni daxil olan müraciətlər, orta gözləmə və xidmət müddəti və digər məsələlər barədə email məktub göndərir. Hətta yekunda müşahidələrinə əsasən tövsiyələr də verir. Biz bu tövsiyələr əsasında müzakirələr aparır, daha operativ xidmət üçün qərarlar veririk".